Një valë e re migrimi masiv ka nisur

Çfarë do të thotë për ekonomitë e pasura?

Vitin e kaluar, 1.2 milionë njerëz u shpërngulën në Britani, me siguri numri më i madh i regjistruar ndonjëherë. Migrimi neto (d.m.th., imigrantët minus emigrantët) në Australi është sa dyfishi i normës para Covid-19.

Në Spanjë, së fundmi, kjo shifër ka arritur nivelin më të lartë të të gjitha kohërave. Gati 1.4 milionë njerëz pritet të shpërngulen në Amerikë këtë vit, një e treta më shumë se përpara pandemisë.

Në vitin 2022, migrimi neto në Kanada ishte më shumë se dyfishi i rekordit të mëparshëm dhe në Gjermani ishte edhe më i lartë se gjatë “krizës së migracionit” në vitin 2015, shkruan The Economist.

Shtetet e pasura po përjetojnë një bum imigracioni, ku popullsia e lindur jashtë vendit po rritet më shpejt se në çdo periudhë të historisë (shih grafikun 1). Çfarë do të thotë kjo për ekonominë globale?

Jo shumë kohë më parë, dukej sikur shumë vende të pasura e kundërshtuan me vendosmëri migrimin masiv. Në vitin 2016, britanikët votuan për Brexit dhe më pas amerikanët për Donald Trump, projekte politike me bindje të forta anti-emigrantë.

Në valën globale të populizmit që pasoi, politikanët nga Australia në Hungari premtuan të godasin emigracionin. Më pas, Covid-19 mbylli kufijtë. Migrimi u ndal, apo edhe u përmbys, pasi shumë njerëz vendosën të riktheheshin në atdhe.

Midis viteve 2019 dhe 2021, popullsia e Kuvajtit dhe e Singaporit, vende që zakonisht pranojnë shumë emigrantë, ra me 4%. Në vitin 2021, numri i emigrantëve nga Australia tejkaloi numrin e imigrantëve në vend, për herë të parë që nga vitet 1940.

Rritja e migrimit ka rikthyer një ndjenjë normaliteti në disa vende. Fuqia punëtore e huaj e Singaporit, kohët e fundit u rikthye në nivelin para pandemisë. Në vende të tjera, ndihet si një ndryshim i skajshëm.

Një shembull i tillë është Newfoundland and Labrador, provinca e dytë më e vogël e Kanadasë për nga popullsia. Kjo zonë ka qenë prej kohësh shtëpia e njerëzve me prejardhje irlandeze-katolike, Migrimi neto në provincë është pothuajse 20 herë më i lartë se norma para pandemisë. Kryeqyteti i provincës St John’s, po duket gjithnjë e më shumë si Toronto.

Heart’s Delight, një vendbanim i vogël rural, tani ka një furrë buke ukrainase. Qeveria provinciale po krijon një zyrë në Bangalore për të ndihmuar në rekrutimin e infermierëve.

Të ardhurit e rinj në Newfoundland janë një mikrokozmos i atyre gjetiu në vendet e tjera të pasura. Me qindra ukrainas kanë mbërritur në ishull, një pjesë e vogël e miliona atyre që janë larguar nga vendi që nga pushtimi rus. Indianët dhe nigerianët gjithashtu duket se janë në lëvizje në një numër të madh.

Shumë prej tyre flasin anglisht. Dhe shumë tashmë kanë lidhje familjare në vendet më të pasura, veçanërisht në Britani dhe Kanada.

Pse po rritet migrimi

Një arsye e rritjes së migrimit është për shkak se njerëzit po kompensojnë kohën e humbur. Shumë emigrantë morën viza në vitin 2020 ose 2021, por e kryen udhëtimin vetëm pasi u hoqën kufizimet e COVID-19. Megjithatë, popullsia me origjinë të huaj e vendeve të pasura (mbi 100 milionë) tani ka kaluar prirjen rritëse para krizës, çka tregon se po ndodh diçka tjetër.

Natyra e ekonomisë post-pandemike është një pjesë e arsyes. Papunësia në vendet e pasura, në nivelin 4.8%, nuk ka qenë kaq e ulët në dekada. Shefat janë të dëshpëruar për punonjës, dhe vendet e lira të punës janë pranë nivelit më të lartë të të gjitha kohërave.

Kështu, njerëzit kanë arsye të mira për të udhëtuar. Luhatjet e monedhës mund të jenë një tjetër faktor. Një paund britanik blen më shumë se 100 rupi indiane, krahasuar me 90 në vitin 2019. Që nga fillimi i vitit 2021, monedha mesatare e tregjeve në zhvillim është zhvlerësuar me rreth 4% kundrejt dollarit. Kjo u mundëson emigrantëve të dërgojnë më shumë para në atdhe se më parë.

Shumë qeveri po përpiqen gjithashtu të tërheqin më shumë njerëz. Kanadaja ka synimin të mirëpresë 1.5 milionë banorë të rinj në vitet 2023-2025. Gjermania dhe India, kohët e fundit, nënshkruan një marrëveshje për të lejuar më shumë indianë të punojnë dhe të studiojnë në Gjermani.

Australia po rrit periudhën kohore për të cilën disa studentë mund të punojnë pas diplomimit nga dy, në katër vjet. Britania ka mirëpritur banorët e Hong Kongut që arratisen nga persekutimi kinez; mbi 100,000 veta kanë mbërritur.

Shumë vende e kanë bërë të lehtë hyrjen për ukrainasit. Edhe ato vende që deri tani kanë qenë armiqësore ndaj emigracionit, duke përfshirë Japoninë dhe Korenë e Jugut, tani po tregohen më të hapur ndaj të huajve, ndërsa kërkojnë të ulin ndikimin e plakjes së popullsisë.

Ekonomitë që mirëpresin shumë emigrantë, kanë prirjen të përfitojnë në planin afatgjatë. Mjafton të shihni Amerikën. Populli i huaj sjell me vete ide të reja. Në Amerikë, emigrantët kanë rreth 80% më shumë gjasa se njerëzit e lindur në vend, që të themelojnë një firmë, sipas një studimi të fundit nga Pierre Azoulay dhe kolegët e tij në Institutin e Teknologjisë në Massachusetts.

Hulumtimet tregojnë se emigrantët ndihmojnë në ndërtimin e lidhjeve tregtare dhe investuese midis vendit të tyre të origjinës dhe atij pritës. Prurjet me punëtorë të rinj gjithashtu ndihmojnë në gjenerimin e më shumë të ardhurave nga taksat.

Disa ekonomistë shpresojnë se vala e migrimit do të ketë përfitime më të menjëhershme. “Imigrimi i lartë është i dobishëm për Rezervën Federale teksa ajo përpiqet të qetësojë tregun e punës dhe të ngadalësojë inflacionin”, thotë Torsten Slok, nga firma e menaxhimit të aseteve Apollo Global Management.

Argumente të tilla mund të jenë tepër optimiste. Duke pasur më shumë njerëz, rritet oferta e punës, e cila, nga ana tjetër, ul rritjen e pagave. Por efekti është shumë i vogël. Ka pak shenja se vendet që pranojnë më shumë emigrantë, kanë tregje më të gjera të punës. Në Kanada, për shembull, paga është ende në rritje me rreth 5% në bazë vjetore (shih grafikun 2).

Populli juaj do të jetë populli im

Emigrantët gjithashtu shtojnë kërkesën për mallra dhe shërbime, të cilat mund të rrisin inflacionin. Në Britani, të ardhurit e rinj duket se po i rrisin qiratë në Londër, një qytet që tashmë kishte një furnizim të kufizuar me banesa të lira.

Një efekt i ngjashëm është i dukshëm në Australi. Vlerësimet nga Banka Goldman Sachs tregojnë se shkalla aktuale e migrimit vjetor neto prej 500,000 njerëzish në Australi, po rrit qiratë me rreth 5%.

Qiratë më të larta shoqërohen me një indeks më të lartë të çmimeve të konsumit. Kërkesa nga emigrantët mund të shpjegojë gjithashtu pse çmimet e banesave në shumë vende të pasura, nuk kanë rënë shumë, pavarësisht nga normat më të larta të hipotekave.

Vitin e ardhshëm, migrimi mund të ulet paksa. Vrulli post-pandemik do të bjerë me kalimin e kohës, ndërkohë që tregjet e punës në vendet e pasura po zgjerohen ngadalë. Në terma afatgjatë, rënia globale e normave të lindshmërisë tregon se mund të ketë mungesë emigrantësh.

Megjithatë, ka arsye për të besuar se nivelet e larta të të ardhurve të rinj, do të mbeten të larta për ca kohë. Politika më mirëpritëse e qeverive është një arsye.

Dhe migrimi i sotëm, lind migrimin nesër, pasi të ardhurit e rinj sjellin fëmijë dhe partnerë. Shumë shpejt kthesa e vendeve të pasura kundër emigrantëve në fund të viteve 2010, do të duket si një lajthitje./Përgatiti: Monitor/