Nora Gjakova e artë në Gjeorgji

Sukseset e Kosovës në xhudo nuk kanë të ndalur. Kampionia e Evropës, Nora Gjakova, është stolisur me medalje të artë në turneun në Grand Prix të Gjeorgjisë, në kategorinë deri në 57 kilogramë.

Në finale, xhudistja kosovare arriti ta mposhtë brazilianen Rafaela Silva, me Ippon, duke treguar formë të jashtëzakonshme.

Paraqitje të mira Nora kishte edhe në duelet paraprake, ku fillimisht e mposhti xhudisten turke, Syema Ozerler, më pas në çerekfinale Eteri Liperteliani dhe në gjysmëfinale holandezen, Sanne Verhagen.

Kjo është medalja e tretë e artë për Nora Gjakovën, e cila vitin e kaluar kishte triumfuar edhe në Kampionatin Evropian në Tel Aviv dhe në Lojërat Mesdhetare në Tarragona.