Oda Amerikane në Kosovë kërkon t`i jepet prioritet gazit të lëngshëm amerikan
Oda Ekonomike Amerikane në Kosovë i ka bërë thirrje institucioneve të reja që të përfshijnë Kosovën në infrastrukturën rajonale të gazit të lëngshëm natyror amerikan, LNG, ta trajtojnë me prioritet dhe ta shqyrtojnë si pjesë të politikës së ardhshme energjetike.
Oda Amerikane, përmes një komunikate, vlerëson se Kosova ndodhet në një moment vendimtar për të ardhmen e sektorit energjetik, ndërsa sipas saj, vendimet që do të merren në periudhën e ardhshme do të ndikojnë në sigurinë energjetike, konkurrueshmërinë e ekonomisë dhe aftësinë për të përmbushur nevojat e zhvillimit ekonomik.
Sipas Odës Amerikane, politikat energjetike duhet të mbështeten në një vlerësim gjithëpërfshirës, duke marrë parasysh shpejtësinë e realizimit të projekteve, sigurinë e furnizimit, mundësitë e financimit, ndikimin në konkurrueshmërinë e ekonomisë, fleksibilitetin e sistemit elektroenergjetik dhe qëndrueshmërinë afatgjatë të investimeve.
Për Kosovën, e cila vazhdon të mbështetet në kapacitete të vjetruara gjeneruese dhe në importe të konsiderueshme të energjisë elektrike, Oda Amerikane thekson se ndërtimi sa më i shpejtë i kapaciteteve të reja prodhuese është faktor me rëndësi strategjike, pasi çdo vonesë rrit ekspozimin ndaj paqëndrueshmërisë së tregjeve rajonale, kostove të larta të importit dhe pasigurisë së furnizimit.
Oda Amerikane vlerëson se përfshirja e Kosovës në infrastrukturën rajonale të LNG-së amerikane do të mundësonte ndërtimin e kapaciteteve të reja gjeneruese brenda një afati relativisht të shkurtër, diversifikimin e burimeve të energjisë, rritjen e fleksibilitetit të sistemit elektroenergjetik dhe integrimin më efikas të burimeve të ripërtëritshme të energjisë. Gjithashtu, theksohet se kjo do të krijonte mundësi më të mëdha për sigurimin e financimit ndërkombëtar për projekte të realizueshme dhe të zbatueshme.
Zhvillimi i kapaciteteve të reja vendore, vlerëson Oda Amerikane, lidhet drejtpërdrejt me sigurinë kombëtare, stabilitetin ekonomik, konkurrueshmërinë e sektorit privat dhe krijimin e një mjedisi më tërheqës për investime, ndërsa një qasje e tillë do të ishte në përputhje edhe me orientimin strategjik të Shteteve të Bashkuara të Amerikës dhe zhvillimet rajonale e evropiane për forcimin e sigurisë energjetike.
Në fund, Oda Ekonomike Amerikane në Kosovë u bën thirrje institucioneve të reja që qasjen në infrastrukturën rajonale të LNG-së amerikane ta trajtojnë me prioritet dhe ta konsiderojnë atë si një investim strategjik për sigurinë energjetike, konkurrueshmërinë ekonomike dhe të ardhmen e Kosovës.
