Pa frikë

Edhe pse mbi 80 media audiovizive dhe po aq gazeta, dhe mbi 800 portale sa thuhet që janë në tokën shqiptare, vetëm në tavolinat e kafeneve mund të dëgjohen lajmet e gazetarëve shqiptarë që nuk raportohen në media. Ky vetëcensurim, si dukuria më e re e tranzicionit shqiptar, konstatohet në të gjitha Raportet e lirive të Mediave dhe të Drejtave të njeriut, ndërkohë që nga “mëkatarët” ka edhe arsyetim!

Të braktisur nga pronarët e mediave, të përbuzur nga politika, të kërcënuar nga krimi dhe të pambrojtur nga shteti, ata gjetën rrugën e vetëcensurimit duke menduar se ky është edhe fundi i frikës që kanë, për të shkruar, për të punuar dhe detyrimisht për të jetuar!

Situata bëhet edhe më serioze kur një pjesë e shoqërisë e pranon këtë realitet. Ka edhe prej atyre që thjesht e quajnë Makiavelizëm, duke nënkuptuar njerëzit që sipas natyrës janë frikacakë, egoist dhe imoralë. Dhe, arsyetohet manipulimi i paskrupullt me njerëzit, dinakërinë, mashtrimet, kërcënimet dhe servilizmin, në mënyrë që të arrihet qëllimi.

Por sa qëndron kjo?! Shkenca thotë se frika është një ndjenjë intensive, e sikletshme dhe negative të cilën njeriu e përjeton kur shikon ose prêt rrezikun, qoftë ai real ose jo. Ky është një reagim i lindur, gjenetikisht i programuar.

Strukutra kryesore në tru që rregullon krijimin e frikës është corpus amygdaloideum. Kur jemi në një situate kërcënuese ose të rrezikshme, talamusi aktivizohet menjëherë dhe i dërgon mesazh corpus amygdaloideum. Fal asaj që ky rrugëtim zgjat vetëm 12 milisekonda, neve na mundëson që të reagojmë shpejt në çdo situatë, për të anashkaluar rrezikun.

Ne, një grup gazetarësh entuziastë, që nuk mendojmë se problemin e frikës mund ta zgjidhim duke e konsideruar si betejë të humbur në këtë realitet shqiptar, duke respektuar edhe shkencën, Sot në Ditën Botërore të Lirisë së Shtypit do të sjellim një gazetë ndryshe, përveç se online. Jo duke shtuar numrin e mediave shqiptare, por do të jemi aty ku është edhe misioni ynë! Duke raportuar të vërtetën dhe duke u shprehur pa qenë të ndikuar nga politika, krimi dhe shteti, pra, Pa Frikë.

“Në fund të fundit, ne të gjithë e dijmë shumë mirë se në anën tjetër të çdo frike është liria,” thotë Merilyn Ferguson, aty ku Pa Frikë do të mundohemi t’ju shpiem Ne!

Me përvojën tonë, me profesionalizmin tonë dhe me besimin që kemi krijuar tek opinion publik me një sakrificë shumë të madhe, Ne po fillojmë rrugëtimin tonë sepse nuk e pranojmë një realitet të krijuar nga përceptimi se frika na ka mposhtur.

Ashtu siç thoshte Zonja e Parë e SHBA për 12 vjet, Eleanor Roosevelt : “Forca, përvoja dhe vetëbesimi grumbullohen sa herë  që ndaloni dhe e shikoni frikën në sy. Ju duhet ta bëni atë që nuk mund të bëni.”