Pandemia, Merkel: Na presin muaj të vështirë!

Gjermania do të përballet me disa muaj të vështirë për shkak të koronavirusit, paralajmëroi kancelarja gjermane, Angela Merkel, duke folur para parlamentit gjerman.

“Gjermania deri më tani ka kaluar pandeminë relativisht mirë falë sjelljes jashtëzakonisht të përgjegjshme të qytetarëve në muajt e fundit, por ne shohim tani që po vjen vjeshta, një fazë e vështirë është përpara,” tha Merkel para Bundestagut, raporton Agjencia e lajmeve Reuters, dhe duke ju referuar të dhënave nga Institutit për sëmundjet infektive, Robert Koch shtoi se sot Gjermania raportoi 1.798 raste të reja me koronavirus.

Ndryshe, dje Kancelarja Merkel diskutoi me udhëheqësit e 16 landeve për të fuqizuar masat kundër pandemisë. Kufizimet synojnë të shmangin me çdo kusht një izolim mbarëkombëtar, tha Merkel, duke saktësuar se mbajtja në funksion e ekonomisë është një përparësi.

Numri i përgjithshëm i të infektuarve në Gjermani, , raporton RFE, ka arritur mbi 280 mijë ndërsa mbi 9 mijë persona kanë vdekur.

Ndër masat që parashikojnë autoritetet gjermane është kufizimi i numrit të personave në tubimet private dhe publike.