Parlamenti letonez, Rusia shtet sponsorizues i terrorizmit

Ligjvënësit në Letoni e kanë cilësuar Rusinë si shtet sponsorizues i terrorizmit, duke përmendur si arsye pushtimin e paprovokuar rus të Ukrainës, aktivitetet e saj ushtarake në Siri dhe disa raste të helmimit të kritikëve të Kremlinit.

Me 67 vota për dhe 16 abstenime, raporton RFE, Parlamenti i Letonisë miratoi sot rezolutën për Rusinë.

Zëdhënësja e Ministrisë së Jashtme ruse, Maria Zakharova, shkroi në Telegram se rezoluta e Letonisë ishte “ksenofobe”.

Përmes rezolutës, ligjvënësit dënojnë “dhunën e Rusisë kundër civilëve në përpjekjet e shtetit për të përfituar politikisht” dhe dënojnë përdorimin e municioneve të ndaluara “për të mbjellë frikë dhe për të vrarë civilët pa dallim”.

Parlamenti i Letonisë, përmes rezolutës, u bëri thirrje edhe shteteve të tjera që t’i bashkohen në këtë vendim.

Gjithashtu iu bë thirrje edhe Bashkimit Evropian që të ndalojë lëshimin e vizave për shtetasit e Rusisë dhe Bjellorusisë, duke theksuar se pushtimi rus i Ukrainës po kryhet me mbështetjen dhe përfshirjen e regjimit bjellorus.

Qëkur ka nisur pushtimi rus i Ukrainës më 24 shkurt, raporton RFE, Ukraina është shprehur se Moska po përdor territorin bjellorus për të kryer sulme ajrore ndaj territorit ukrainas.