Partia e Kryeministrit Rutte fiton zgjedhjet në Holandë

Partia e kryeministrit të Holandës, Mark Rutte, fitoi në zgjedhjet parlamentare. Kështu Rutte merr mandatin e katërt për të formuar qeverinë e re të koalicionit, të udhëhequr nga partia e tij liberale e qendrës së djathtë VVD.

Qeveria e tij e fundit dha dorëheqje në janar, për shkak të një skandali të mashtrimit me fondet e mirëqenies së fëmijëve, skandal i cili nuk ndikoi negativisht në rezultatin e zgjedhjeve.

Pjesëmarrja në zgjedhjet e 17 marsit ishte 82.6 për qind, raporton RFE për zgjedhjet të cilat shihen si referendum mbi masat e Qeverisë holandeze ndaj pandemisë COVID-19.

Ndryshe, më shumë se 16.000 njerëz kanë vdekur nga COVID-19 në Holandë, ndërsa protestat kundër masave të bllokimit janë kthyer shpesh në dhunë. Për të frenuar normën e lartë të infeksionit, Holanda ka në fuqi orën policore gjatë natës dhe ndalimin e tubimeve publike gjatë ditës.

Si rezultat, fushata zgjedhore është zhvilluar kryesisht përmes debateve televizive.

“Votuesit e Holandës i kanë dhënë partisë sime një votë të madhe besimi,” tha Rutte para gazetarëve duke pranuar se “jo gjithçka ka shkuar mirë në dhjetë vjetët e fundit”, por tha se çështja kryesore në tryezë tani është rindërtimi i vendit pas pandemisë COVID-19.