Pas 12 vitesh, flamuri i Bashkimit Evropian kthehet në Parlamentin hungarez

Kryetarja e re e Parlamentit hungarez, Agnes Forsthoffer, sot bëri të ditur se është kthyer flamuri evropian në godinën në Budapest, pas një mungese dymbëdhjetëvjeçare.

“Urdhëroj që nga sot, pas dymbëdhjetë vitesh, flamuri i Bashkimit Evropian të valëvitet përsëri mbi ndërtesën e Parlamentit hungarez,” tha Forsthoffer, e cila u zgjodh në seancën konstituive të parlamentit me 193 nga 199 vota, duke theksuar se ky “vendim i parë” në rolin e saj të ri duhet të përfaqësojë një hap të parë simbolik drejt kthimit të vendit të Evropës Qendrore në Evropë.

Konservatori proevropian Peter Magyar u betua sot si kryeministër para parlamentit hungarez, më pak se një muaj pas fitores së tij dërrmuese në zgjedhjet parlamentare kundër nacionalistit Viktor Orban.

Pas euforisë së fitores, e cila pa hungarezët të kërcenin dhe këndonin në rrugët e Budapestit, pritjet janë të larta për njeriun që premtoi “ndryshim regjimi” për t’i dhënë fund korrupsionit dhe sulmeve ndaj lirive që kanë karakterizuar sundimin 16-vjeçar të Orban.

Hungaria përballet gjithashtu me një sërë sfidash ekonomike, duke filluar me një ekonomi në stanjacion dhe përkeqësim të shërbimeve publike, që kërkojnë reforma strukturore që do të kërkojnë kohë.

Peter Magyar, 45 vjeç, u betohet sot në seancën inauguruese të parlamentit, e cila filloi në mëngjes.

Ceremonitë që shënuan inaugurimin e tij, si brenda ashtu edhe jashtë parlamentit, ishin të mbushura me simbolikë, me flamuj dhe muzikë që i bënin homazh anëtarësimit të Hungarisë në BE, pakicës së saj të madhe rome dhe pakicave hungareze që jetojnë në vendet fqinje.