Pas përmbytjeve vdekjeprurëse, anulohet gara e Formula 1 në Itali

Nëntë persona kanë vdekur dhe disa të tjerë konsiderohen të zhdukur, si pasojë e shirave të rrëmbyeshëm, të cilët kanë përmbytur rajonin Emilia-Romanja në Itali, thanë zyrtarët.

Rreth 10.000 njerëz janë evakuuar, raporton RFE, dhe disa është dashur të shpëtohen nga kulmet e shtëpive, me helikopterë.

Autoritetet thanë se 14 lumenj kanë dalë nga shtretërit e tyre, dhe kanë përmbytur 23 qyteza.

Kryetari i Ravennas, Michele de Pascale, tha se qyteti tani është i tjetërsuar.

Gara e planifikuar këtë fundjavë, Formula 1 Grand Prix, në Emilia-Romanja, është anuluar.

Në diskutimet mes të autoriteteve lokale dhe organizatorëve të garës në Imola, është vendosur që ngjarja nuk mund të mbahet.

Sasi edhe më e madhe e shiut, pritet të bjerë edhe në ditët në vijim.

“Kjo mund të ketë qenë nata më e rëndë në historinë e Romanjas,” tha Pascale, për televizionin publik italian, RAI.

Kryetari i qytezës së afërt, Forli, Luca Zattini, tha se qyteti është gjunjëzuar, i shkatërruar dhe në dhimbje.

Kryeministrja italiane, Giorgia Meloni, raporton RFE, e ka organizuar një takim me ekipin e krizave dhe më pas i ka falënderuar ekipet e shpëtimit, që e kanë rrezikuar jetën për t’iu ndihmuar viktimave.