Pas takimit me Komisioneren për Zgjerim, Kurti: Mbi 40 muaj që kemi aplikuar, duhet avancim për Kosovën

Pas takimit me Komisioren Evropiane për Zgjerim, Marta Kos, në Prishtinë, kryeministri në detyrë, Albin Kurti ka kërkuar avancimin e aplikimit të Kosovës për fitimin e statusit kandidat për integrim në BE ndërsa konstatoi se vakuumi që po lë BE-ja ndaj Kosovës po keqpërdoret nga Serbia nëpërmjet sulmeve.

“Me komisioneren Marta Kos kemi ngritur edhe çështjen e statusit kandidat dhe të hapjes së negociatave. Janë bërë mbi 40 muaj që kur kemi aplikuar dhe momenti i ripërtërirë i zgjerimit nga ana e Bashkimit Evropian duhet të rezultojë me avancimin e merituar të Kosovës,” tha Albin Kurti në konferencë e përbashkët për media me Marta Kos.

“Raporti i Këshillit të Evropës: Kuadri ligjor i Kosovës përtej standardeve ndërkombëtare”

Në vitet e fundit, tha Kurti, Kosova ka avancuar në përgatitjen e shumë kapitujve, ka shënuar progres në nivel të moderuar të përgatitjes në pesë kapituj dhe në nivel të caktuar të përgatitjes në tetë kapituj të tjerë.

“Nga progresi i kufizuar në progres të theksuar kemi kaluar në 18 kapituj dhe nga progresi i theksuar në progres të mirë në pesë kapituj të tjerë. Pra, kemi përparim të vazhdueshëm dhe të qëndrueshëm. Kemi kuadrin kushtetues më të avancuar për të drejtat e pakicave në rajon. Raporti i Këshillit të Evropës për vlerësimin e aplikimit tonë për anëtarësim thekson se kuadri ligjor i Kosovës, në rastin e Kushtetutës, shkon edhe përtej standardeve ndërkombëtare,” tha Kryeministri në detyrë duke shtuar se mbështetja publike për anëtarësimin në BE, qëndron vazhdimisht rreth 90 për qind dhe është ndër më të lartat nga të gjitha vendet kandidate.

Sipas Albin Kurtin, vakuumi që BE po i lë Kosovës gjatë procesit të anëtarësimit, po keqpërdoret me sulme nga fqinji verior.

“Vakuumi që lë Bashkimi Evropian po synohet që të mbushet nga aktorë të tjerë dashakqinj, të cilët i minojnë vlerat e Bashkimit Evropian dhe rrezikojnë sigurinë tonë të përbashkët, prandaj është përgjegjësia e të gjithë neve që Kosova të avancojë në procesin e integrimit,” tha Kurti dhe përderisa çelësi kryesor për bashkëpunim të suksesshëm rajonal është fqinjësia e mirë evropiane, Kosova ka përjetuar dy sulme terroriste në tre vitet e fundit nga Serbia.

“Në Banjskë më 24 shtator 2023 dhe në kanalin Ibër-Lepenc në infrastrukturë kritike më 29 nëntor 2024, që të dyja këto të dirigjuara e financuara nga fqinji ynë verior. Llogaridhënia për këto sulme është thelbësore, pasi pa llogaridhënie rreziku ndaj sigurisë sonë mbetet i lartë. E kemi një fqinj agresor e agresiv që të sulmon në vend se të bashkëpunojë. Kjo është sfidë sa për sigurinë, po aq edhe për bashkëpunimin rajonal,” tha Kryeministri në detyrë i Kosovës duke theksuar se Serbia gjithashtu po vazhdon të mbajë të bllokuar marrëveshjen për njohjen e diplomave, e cila është në përputhje të plotë me standardet dhe me direktivat e Bashkimit Evropian, e në anën tjetër Bosnje Hercegovina nuk po heq vizat për Kosovën.

Në fund, Kurti ka falenderuar Komisioneren Kos për para financimin nga marrëveshja për planin e rritjes në vlerë prej 61.8 milionë eurove, për liberalizimin e vizave nga viti 2024, për pjesëmarrjen në tregun e përbashkët rajonal dhe në instrumentet para anëtarësimit.

“Në CEFTA, në përfaqësimin tonë direkt për herë të parë, e kryesuam me sukses, ndërkohë që edhe kaluam të gjitha protokollet e mbetura në Kuvend. Kemi pesë marrëveshje që kemi nënshkruar në Procesin e Berlinit, i cili tashmë është i lidhur ngushtë me tregun e përbashkët rajonal,” tha Kryeministri në detyrë i Kosovës, Albin Kurti, duke vlerësuar se mungesa e Parlamentit funksional gjatë vitit që shkojë ka bërë që disa reforma të vonohen, e tashmë po rrezikohen edhe për afatin e qershorit ndërsa po punohet maksimalisht për të minimizuar ndikimin në reforma që po shkakton bllokada në Parlament.

Komisionerja Kos: Anëtarësimi i Kosovës në BE varet nga reformat dhe dialogu

Komisionerja Evropiane për Zgjerim, Marta Kos, tha se koha kur do të ndodh anëtarësimi i Kosovës në Bashkimin Evropian ndërlidhet me suksesin që duhet të dëshmojë në zbatimin e reformave dhe dialogun me Serbinë.

“Sigurisht që ka vend për Kosovën në Bashkimin Europian dhe në procesin e anëtarësimit. Zakonisht ne nuk punojmë me data, por në varësi të përparimit dhe mënyrës sa më të suksesshme të mundshme, do të jemi në gjendje të fillojmë negociatat, negociatat e vërteta. Sa më e suksesshme do të jetë Kosova në zbatimin e reformave, sa më e suksesshme të jetë në dialogun Beograd-Prishtinë, më të mëdha janë shanset që të nisin negociatat. Negociatat e vërteta. Pra, kjo është pjesa politike,” tha Martat Kos pas takimit me Albin Kurtin duke shtuar se përtej pjesës së negociatave teknike, procesi i anëtarësimit lidhet me marrëdhëniet me shtetet anëtare të BE-së.

“Thirrja ime për veprim ndaj çdo vendi kandidat është që të angazhohet edhe me shtetet anëtare dhe atëherë kjo mund të ndodhë. Prandaj nuk mund t’ju jap një vit të caktuar, por jam 100% e sigurt dhe do të punoj pa u lodhur për qëllimin që ta afroj Kosovën gjithnjë e më shumë me Bashkimin Evropian,” tha Komisionerja për Zgjerim në Prishtinë, e prerë:

“Nuk ka siguri në Evropë pa Kosovën!”

Në fund, Komisionerja Evropiane për Zgjerim, Marta Kos, tha se ndikim te shtyrja e anëtarësimit kanë pasur çështjet e sigurisë. Ajo theksoi se s’mund të ketë siguri në Evropë pa Kosovën ndërsa përfundoi:

“Nuk mund të ketë siguri në Evropë pa Kosovën. Kosova është pjesë integrale e një tabloje më të madhe, arsye pse zgjerimi sot është shumë më tepër sesa thjesht zgjerim. Ka të bëjë me kujdesin për sigurinë në Evropë, me të qenit bashkë, me bashkëpunimin rajonal që e përmendët edhe ju, dhe sigurisht edhe përmes integrimit në Bashkimin Evropian.”