Pasi shqiptarët kaluan testin e durimit, Bordi vjen me çmimin rekord të naftës

Shumë qytetarë kanë pyetur kur do të ndalet Bordi i Transparencës me çmimet e karburantit, por meqë shqiptarët kaluan testin e durimit në muajin mars me çmimin e naftës 260 lekë për litër, Bordi sot vjen me çmimin rekord të naftës në histori, 265 lekë për litër.

Përveç rritjes së naftës, Bordi i Transparencës ka vendosur çmimet e shitjes me pakicë dhe shumicë të benzinës me një rënie të lehtë, ndërsa ka mbetur i pandryshuar çmimi i tregtimit të gazit.

Kështu, çmimi i shitjes me pakicë të naftës do të jetë 265 lekë për litër, nga 258 lekë që ishte nga data 8 qershor, ndërsa çmimi i shitjes me shumicë 253 lekë/litër, nga 246 lekë nga vendimi i mëparshëm.

Benzina do të tregtohet me 241 lekë për litër nga 243 që ishte më parë. Çmimi i shitjes me shumicë të këtij nënprodukti shkon në 229 lekë për litër nga 231 lekë.

Çmimi i shitjes me pakicë i nënproduktit gaz, do të jetë 86 lekë për litër ndërsa me shumicë 74 lekë për litër për automjetet.

Ndryshe, çmimet e caktuara nga Bordi do të hynë në fuqi sot datë 17 Qershor ora 18.00 p.m dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes.