Për fermerët dhe transportin publik, Berisha: Urgjent të heqim çdo taksë ndaj naftës

Kryetari i Partisë Demokratike, Sali Berisha, ka kërkuar sot nga Parlamenti i Shqipërisë të bëhet një ndërhyrje urgjente për të hequr çdo taksë ndaj naftës, ndërsa ka akuzuar Kryeinistrin Edi Rama për mashtrim sepse, sipas tij, nuk ka një vend në BE që ka hequr subvencionin e naftës.

Duke folur për subvencionin e naftës në bujqësi, Kryetari i Partisë Demokratike tha nga foltorja e Parlamentit se vendet në BE ndahen në tre grupe, ato që bëjnë subvencion maksimal, ato që bëjnë subvencion mesatar dhe ato që bëjnë subvencion më të ulët.

“Ky parlament nuk mund të ketë, në qoftë se mban parasysh interesin e qytetarëve shqiptarë, në agjendë tjetër veçse vjedhjet e binomit Rama-Balluku.
Çështja e dytë që ky parlament duhet të debatojë dhe t’i japë zgjidhje është çështja e naftës.
Kreu i juaj u deklaroi socialistëve në Lushnjë se Europa nuk subvencionon më naftën.
Një mashtrim të turpshëm, të paskrupullt dhe ju që qeshni, ju bëni skllavin këtu.
Sepse sfidoj çdo njeri dhe çdo shqiptar, të gjejë një vend të vetëm anëtar të BE që të mos subvencionojë naftën për fermerët.
Përkundrazi, Gjermania e rriti këtë vit subvencionin dhe mundet edhe vendet e tjera.
Të shkosh dhe të deklarosh vetëm pse janë socialistë dhe mund t’u thuash çdo gjë, se Europa nuk subvencionon më naftën, bën një akt cinik, një mashtrim ndaj rreth 40 përqind të shqiptarëve, që ç’është e vërteta është pjesa që djersin më shumë, që sakrifikon më shumë qoftë për kafshatën, qoftë për prosperitetin e vet dhe të vendit.
Ndaj dhe ju që jeni këtu, ose gjeni një vend në BE që nuk jep subvencione nafte, ose damkoseni drejtuesin tuaj si një mashtrues ordiner, që në çdo fjalë nxjerr një mashtrim dhe vendosim këtu të rikthejmë me ligj subvencionin e naftës duke hequr ndaj saj çdo taksë jo vetëm për fermerët, por edhe për transportin publik.
Ju e morët vesh se u pakësuan me 40 përqind linjat e autobusëve, ndaj dhe të bëjmë këtu një ndërhyrje urgjente që të subvencionojmë fermerët.
Vijnë miliarderët e naftës dhe e marrin me 600 lekë naftën, dhe ata kanë rëndësi në ekonomi se hapin shishe shampanje me Ramën. Po ky është turp mo, a përfaqësoni ju apo ata fermerë apo jo? Duhet ta hedhësh në votim këtë çështje,” tha Sali Berisha duke përsëritur se Kosova me gjysmën e buxhetit tonë ka ndarë katër herë më shumë për bujqësinë se Shqipëria

“Mashtrimi është bërë ligji i tyre. Ligji themelor i moralit të tyre. Në Shqipërinë rurale, qeveria e mëparshme ka investuar 3 miliardë euro dhe ka ndryshuar në kulturën më tradicionale të zonës fushore kodrinore të Shqipërisë, nga 4 milionë rrënjë që vinin nga koha e Skënderbeut, në 11 milionë rrënjë.
S’i zhbëni dot kurrë.
Së dyti, nuk matemi me vendet e BE dhe kjo është e drejtë, por vetëm për Kosovën duhet t’u rikujtoj këtu, Kosova ka ndarë këtë vit 200 milionë euro për bujqësinë.
Kosova ka ndarë katër herë më shumë se Shqipëria. Kosova jep për një hektar grurë, 400 euro.
Kosova jep për një hektar grurë për plehrat, 100-150 euro. Jep për farën, jep për naftën.
Pra, jo të krahasohemi me Gjermaninë, jo, as me Francën, as më Italinë, por me Kosovën po. Kosova ka gjysmën e buxhetit tonë, 4 miliardë euro. Po ç’keni mor kështu kaq të mjerë që ngriheni dhe bëni papagallin e një hajduti që po shkatërron vendin? Si është kjo puna juaj? A keni ndjenja ju? A jeni shqiptarë?”

Në fund, Kryetari i Partisë Demokratike foli dhe për mashtrimin e Edi Ramës lidhur me subvencionet.

“Tani, le të gjejnë një vend të vetëm në BE që ka hequr subvencionin e naftës. Absolutisht, asnjë vend!
Ua them unë ju.
Vendet në BE ndahen në tre grupe. Ato që bëjnë subvencion maksimal, ato që bëjnë subvencion mesatar dhe ato që bëjnë subvencion më të ulët.
Këtë vit, Gjermania që bënte subvencion mesatar, kaloi në subvencion maksimal.
Se je bërë i famshëm ti, merita jote më e madhe që fut ato dosat në shpërblim. Shumë mirë ke bërë, por nuk është vetë dosa ajo që u duhet fermerëve.,” tha Kryetari i Partisë Demokratike, Sali Berisha, duke përfunduar:
“Në radhë të parë është nafta. Në radhë të parë duhet t’u japim naftën. Atë mirë e ka bërë, nuk them.”