Përgjigje Ballkanit të Putinit! Berisha: Protesta më 7 korrik, nuk ndalet deri në realizimin e qëllimit!

Kryetari i Partisë Demokratike, Sali Berisha, sot ndërsa i bëri thirrje deputetëve të PD që të shkëputen nga Enkelejd Alibeaj dhe Lulzim Basha dhe të marrin pjesë në protestën e 7 korrikut, e cila sipas vlerësimit të tij, nuk do të ndalet deri në realizimin e qëllimit.

Më 7 korrik tha Kryetari i PD, do të protestohet jo vetëm kundër krizës së rëndë ekonomike dhe projektit Ballkani i Hapur, por edhe kundër miliarderit ultramajtist George Soros ndërsa  shtoi se mirëpret LSI-në dhe Ilir Metën për t’iu bashkuar opozitarizmit kundër Edi Ramës.

“Deputetët janë të ftuar të rreshtohen me shumicën. Janë të ftuar të japin kontributin e tyre dhe të rreshtohen me shumicën. Të shkëputen nga Ali-Basha i cili është varianti bis i Lulzim Bashës në raportet me Edi Ramën. Vetëm një ndryshim mund të ketë se Bashës i bënte ndonjë telefonatë Rama, kurse për këta ka ngarkuar Taulant Bego Yaris apo Taulant Sharrën,” tha Sali Berisha duke sqaruar dhe qëllimin e protestës:

“Qëllimi i protestës është të ngrejë qytetarët në këmbë kundër këtij regjimi armiqësor. Çdo njeri që i thotë vetes shqiptar, e konstaton këtë. T’i ngremë shqiptarët në këmbë kundër një regjimi që ka futur duart në xhepat e tyre dhe po i varfëron çdo ditë,” tha kryedemokrati duke saktësuar se më 7 Korrik do të protestohet edhe kundër Ballkani i Hapur dhe George Sorosit.

“E konsideroj atë një armik të stabilitetit dhe të demokracisë në Shqipëri. Me mbështetjen e projekteve në sinkron me Lavrovin dhe Putin, Soros fakton se është një faktor i rrezikshëm për paqen në Ballkan,” tha Berisha ndërsa sqaroi qëndrimin e tij për bashkëpunim me LSI-në dhe Metën:

“Disa herë jemi takuar në Baku me presidentin Meta. Ai i mbyll këtë javë detyrimet. Mirëpritet kontributi i tij dhe i LSI-së në opozitarizmin kundër Edi Ramës. Do bashkohemi me të gjitha forcat politike që besoj se ky regjim është armiqësor ndaj shqiptarëve.

“Ideja ime është një front opozitar, me një udhëheqje kolektive, ku rol kryesor ka PD. Kontributi i çdo force politike, apo faktori tjetër, organizata të shoqërisë civile, individ i shquar është i mirëpritur. Ne jemi të hapur. Rama duhet të përballet me frontin për shpëtimin e Shqipërisë”.

Në fund, Kryetari i PD, duke i bërë thirrje qytetarëve, intelektualëve dhe këdo që të bëhet pjesë e saj, ishte i prerë se protesta nuk duhet të ndalet gjer në realizimin e qëllimit.

“Le t’i japim me datën 7 korrik përgjigjen më të merituar Ballkanit të Hapur apo Ballkanit të Putinit. Të dëshmojmë bashkërisht besnikërinë tonë ndaj orientimit perëndimor. Të dëshmojmë se për shqiptarët, anëtarësimi në BE është ëndrra më e bukur, e ardhmja më e shkëlqyer për ta,” tha Kryetari i PD, Sali Berisha, në konferencën e përjavshme për media duke përfunduar:

“Protesta duhet të jetë e atillë që nuk duhet të ndalet gjer në realizimin e qëllimit. Se cila do jetë kjo protestë, do e përcaktojë vetë protesta. Mos harroni një gjë, një parim: ky është një front. Fronti për Shpëtimin e Shqipërisë. Në një lëvizje, suksesi përcaktohet kur pranon që njëherë udhëheq ti, njëherë të udhëheqin. Vetëm në këtë mënyrë arrihet te suksesi. Unë jam i gatshëm që të udhëheq dhe të më udhëheqin.”