“Përhapi panik”/ Komisioneri Europian i shpëtoi burgut, Rama: Aman ju lutem mos e thoni se do të ngelet në lajme…

Komisioneri i ri Europian për Menaxhimin e Krizave, Janez Lenarčič pas takimit të sotëm me kryeministrin Edi Rama ndërsa u informua për të situatën pas tërmetit të 26 nëntorit që la 51 viktima dhe rrënoi mijëra banesa tha se prania e tij në Shqipëri është për të treguar solidaritet dhe mbështetje dhe ndërsa inkurajoi për rindërtim dhe parandalim duke e pranuar se sërish do të ketë tërmete, fjali për të cilën çdo shqiptar do të shkonte në burg, ndërhyri Kryeministri Edi Rama duke e lutur që mos ta thotë këtë gjë sepse do të ngelet në lajme dhe këmbënguli: Jo, nuk do të ketë tërmete fare!

“Prania ime tregon solidaritet. Synimi është që Shqipëria të mos ndjehet se këtë situatë do e kalojë vetëm. Kemi një angazhim të fortë e solid për të bërë gjithçka që është e mundur në këtë situatë të vështirë,” tha Janez Lenarčič i cili pas bilancit të dëmeve që raportoi Edi Rama dhe planin për rindërtim në zonat e shkatërruara, kishte një mesazh interesant për shqiptarët.

“Do t’ju inkurajoja që të shihnit këtë pjesë të rindërtimit në një këndvështrim më të gjerë duke përfshirë edhe përmirësime në fushën e parandalimit dhe parapërgatitjes, dikur dhe do zoti sa më larg të jetë e mundur por do të ketë tërmete!”

Pas këtij togfjalëshi për të cilin çdo shqiptar do të përfundonte në pranga, Kryeministri reagoi ashpër duke theksuar se nuk do të ketë tërmete:

“Aman ju lutem mos e thoni se do të ngelet në lajme, jo nuk do të ketë tërmete fare. Natyra bën të sajën por ajo që thatë ju në lidhje me planin është tërësisht thelbësore, kemi pasur përmbytje që kanë shkaktuar dëme të mëdha, edhe ato janë fatkeqësi natyrore, e do të ishte mendjelehtësi nëse nuk do ta mendonim. Ne nuk parandalojmë tërmetet por duhet të parandalojmë dëmtimet e shumta. Këtu situata është e tillë, njerëzit janë shumë të tensionuar dhe nën presion.”

Meqë Komisionerit Lenarčič nuk I vuri prangat, Edi Rama tha se dëshiron një tranzicion të qetë për personat e pastrehë, pasi rindërtimi kërkon kohë.  

“Kemi dy kategori njerëzish në nevojë. Ata që jetojnë në zonat urbane dhe ata në zonat rurale. Në zonat urbane zgjidhja jonë ka qenë strehimi në hotele. Kemi bërë marrëveshje për t’i paguar ato në bazë kostosh. Por kjo nuk mund të zgjasë pafundësisht. Synimi ynë është që personat të qëndrojnë aty edhe për festat e fundvitit dhe në Janar të fillojmë t’i lëvizim nga hotele në apartamente që do të merren me qira nga ne dhe në të njëjtën kohë të punohet për rindërtimin e banesave të tyre. Atyre që janë në fshat nuk mund t’u them lëreni tokën dhe hajdeni në hotel se e kanë të lidhur ditën me tokën dhe bagëtinë. Ata kanë nevojë për çadra. Falë Luigit kanë ardhur çadrat dhe janë fantastike dhe kanë minimalen që të mos ndihen në qiell të hapur. Ky do ishte një tranzicion i mirë ndërkohë që të na linte kohë të merreshim me rindërtimin.”

Kryeministri Edi Rama edhe një herë përsëriti me këtë rast se pse e kundërshton solidaritetin e atyre që kanë shprehur gatishmërinë për të ndërtuar banesa: “E mira do ishte të kishim një fond të integruar. Ka organizata dhe shtete që thonë, unë do të vij, por dua të ndërtoj kaq banesa. Nuk mund të jetë kështu pasi krijon konfuzion, standarde të ndryshme etj. Sot kemi miratuar buxhetin, kemi bërë një përpjekje të madhe që të vendosim një pjesë të madhe për rindërtimin. Pas miratimit në parlament ju premtoj që Luigi do të ketë të gjitha hollësitë.”

Më pas me Komisionerin Europian për Menaxhimin e Krizave, Janez Lenarčič, Edi Rama vizitoi zonat e goditura nga tërmeti në Durrës.