Përmbytjet në Kosovë, MPB: Gjendja po qetësohet, uji po largohet me pompa

Me ndërprejen e reshjeve të shiut, pas mbledhjes së raporteve periodike të të gjitha institucioneve, Ministria e Punëve të Brendshme ka bërë të ditur se Kosova ka kaluar të premten një natë të qetë.

Përmes një komunikatë, sot MPB thekson se njësitet e Agjencisë për Menaxhimin e Emergjencave, AME, po vazhdojnë të largojnë me pompa ujin në shtëpitë e përmbytura nga uji.

“Njësitet profesionale të AME-së po vazhdojnë angazhimin me pompa për largimin e ujit në shtëpitë dhe në zonat ku ka pasur përmbytje nga vërshimet. Aktualisht, po intervenohet edhe në infrastrukturën e prekur nga vërshimet në mënyrë që shërbimet dhe qarkullimi për qytetarët të normalizohet. Në fokus vazhdojnë të jenë kërkesat dhe nevojat e familjeve që janë evakuuar dy ditët e fundit,” thekson Ministrna e Punë të Brendshme përmes komunikatës, duke përfunduar:

“Qendra Operative Emergjente e Ministrisë së Punëve të Brendshme do të vazhdojë koordinimin ndër-institucional me qëllim të reagimit në rastet e nevojshme dhe ndaj kërkesave të mundshme që do i pranojë nga Komunat dhe nga qytetarët.”

Ndryshe, reshjet e shiut që nisën të enjten kanë shkaktuar përmbytje në disa qytete të Kosovës, duke bërë që shumë shtëpi, rrugë e toka të përfundojnë nën pushtetin e ujit. Gjendja më e rëndë është vlerësuar të jetë krijuar në Mitrovicë dhe Skenderaj.