Përsëritet kërkesa për Qeverinë e Kosovës, Hovenier: Të shtyhet zbatimi i rregullores së BQK-së!

Pas një takimi që ka zhvilluar me Kryeministrin Albin Kurti, Ambasadori i SHBA-së në Kosovë, Jeffrey Hovenier, tha se e ka përsëritur kërkesën ndaj Qeverisë së Kosovës për shtyrje të vendimit për zbatim të rregullores së Bankës Qendrore të Kosovës, BQK.

Ambasadori amerikan tha se ndonëse Shtetet e Bashkuara e mirëpresin vendimin e Kosovës për respektim të Kushtetutës së vendit, SHBA beson që duhet të ketë periudhë edukuese për rregulloren e re.

“Unë mund të them që kërkesë e SHBA-së është që kjo të shtyhet. Ka shumë punë për t’u bërë deri në implementimin e saj. Qeveria ka folur për një periudhë transicioni dhe ne shpresojmë që ky transicion t’i marrë parasysh shqetësimet për këtë çështje,” tha Ambasadori Hovenie i prerë:

“Ne besojmë që Qeveria do të jetë partner i joni në këtë çështje. Nëse ajo vendos ndryshe atëherë kjo do të ketë ndikim në cilësinë e partneritetit tonë!”

Ndryshe, Rregullorja e BQK-së parashikon që valuta e vetme për kryerjen e pagesave në Kosovë të jetë Euro. Kështu, serbëve të Kosovës u pamundësohet përdorimi i dinarit.

Autoritetet ndërkombëtare vazhdojnë të kërkojnë që BQK të shtyjë vendimin, por, Banka Qendrore e Kosovës la të hapur vetëm mundësinë e një periudhë kalimtare për zgjidhjen e shqetësimeve të komunitetit serb. BQK thotë se duhet të hapen kanalet e komunikimit ndërmjet Bankës Qendrore të Kosovës dhe asaj të Serbisë për këtë çështje, por kjo është hedhur poshtë nga Presidenti i Serbisë, Aleksandar Vuçiç, i cili vazhdon dhe akuzon si çdo vendim të autoriteteve kosovare edhe këtë vendim me pretendimin se “ka për qëllim spastrimin etnik të serbëve”!