Përshkallëzim i tensioneve mes Izraelit dhe Turqisë. Ish-kryeministri izraelit: Netanyahu e ka humbur busullën

Përshkallëzimi i qëllimshëm i tensioneve nga kryeministri izraelit Benjamin Netanyahu me Turqinë është “i pamatur dhe budallallëk”, tha ish-kryeministri izraelit Ehud Barak pasi Izraeli kreu një sulm ajror në një bazë ushtarake në veriperëndim të Sirisë që Ankaraja synonte ta merrte nën kontroll.

“Është e vështirë të vendosësh se cili është më i theksuar,” shprehet Ehud Barak përmes rrjetit social X.

“Kjo mbanë erë të fortë në një motiv politik, të shkosh në zgjedhje me një sërë tensionesh sigurie që do të nxisnin frikën publike”, shtoi ai. Duke theksuar se Turqia nuk është “as Irani dhe as Siria e Asadit”, Barak tha se asnjë problem apo çështje me Ankaranë nuk është e pazgjidhshme.

“Netanyahu është i përqendruar vetëm në mbijetesën politike”

“Nuk ka asnjë problem strategjik me Turqinë që nuk mund të zgjidhet, zbutet ose shtyhet në planin afatgjatë nga kontaktet diskrete të koordinuara me Shtetet e Bashkuara dhe ndikimin e saj në Turqi dhe Siri. Netanyahu e ka humbur plotësisht busullën, qëllimi i tij i vetëm është i qartë”, tha ai.

Ehud Barak e thotë me bindje se Netanyahu nuk është i përqendruar te siguria e Izraelit, por te mbijetesa politike, si një “lojtar bixhozi”, për shkak të “dështimit të plotë” për të arritur qëllimet e luftës dhe humbjes së pritur politike.

“Sjellja e tij e pamatur shqetëson thellësisht aleatët dhe miqtë tanë të paktë të mbetur në të gjithë botën dhe në rajon.”

Do të duhet “shumë kohë” për të riparuar dëmin e sigurisë dhe diplomacisë që ka shkaktuar Netanyahu, vlerëson Ehud Barak duke shtuar se “nuk ka kuptim të merren masa shtesë të pamatura” që në fund mund të bien kokës.