Përveç autoritetit që i jep Rama, Berisha: Alibeaj nuk ka asnjë tagër nga PD!
Duke hedhur poshtë çdo debat dhe vendim që po publikohet në media si produkt i mbledhjes së grupit të deputetëve të Lulzim Bashës të kryesuar nga Enkelejd Alibeaj për zgjedhjen e Presidentit të Republikës, Kryetari i PD, Sali Berisha, tha se Alibeaj nuk ka asnjë autoritet dhe tagër nga PD, përveç autoritetit që i jep Edi Rama.
“Përveç autoritetit që i jep Rama, Alibeaj nuk ka asnjë autoritet dhe tagër nga PD. Çdo veprim i tij është sintonizim i një farse të shpifur të zgjedhjes së Presidentit nga Edi Rama me kallp opozitën. Dua të dënoj me ashpërsinë më të madhe pikëpamjen e Edi Ramës, të konsiderimit të emigracionit dhe diasporës si një zonë e veçantë elektorale,” u shpreh Sali Berisha duke e bërë të qartë se çdo përpjekje e Edi Ramës përmes veglës së tij Alibeaj për një zonë të veçantë për emigracionin do të përballet me rezistencë mbarë kombëtare.
“Çdo përpjekje e shprehur nëpërmjet veglës së tij Alibeaj për një zonë të veçantë për emigracionin është përpjekje anti-demokratike. Është fyerje e madhe që i bëhet emigrantëve dhe diasporës shqiptare në të katra anët. Do të hasë kjo rezistencë mbarë kombëtare”.
