“Policia bashkëpunon me krimin”, deputetët e opozitës kërkojnë seancë dëgjimore me Altin Dumanin

Pas deklaratës së kreut të SPAK, Altin Dumani, gjatë raportimit në Këshillin e Lartë të Prokurorisë, “se disa çështje nuk mund të hetohen dot në Policinë e Shtetit, për shkak se zyrtarë të lartë të saj kanë bashkëpunuar me krimin”, nëntë deputetë të opozitës si anëtarë të Komisionit të Sigurisë Kombëtare kërkuan një seancë dëgjimore me Dumanin.

Nisur nga kjo deklaratë, nëntë deputetët opozitarë shprehen se “Dumani ka raportuar se nivelet e larta të Policisë së Shtetit kanë sabotuar hetime të rëndësishme, janë të pabesueshme si dhe kanë penguar hetimin e ngjarjeve të caktuara duke vështirësuar hetimet e SPAK”.

Për këtë arsye, deputetët Ferdinand Xhaferi, Lindita Metaliaj, Isu Çelaj, Flamur Noka, Asllan Dogjani, Ervin Salianji, Lefter Gështenja, Kasem Mahmutaj dhe Monika Kryemadhi, kërkojnë Altin Dumanin në mbledhjen më të afërt të këtij Komisionit Sigurisë Kombëtare, për të raportuar gjetjet e tij, dhe shqetësimet për këtë problematikë që e konsiderojnë si problem serioz për sigurinë kombëtare. .

Për deklaratën e kreut të Prokurorisë së Posaçme, Altin Dumani, ka reaguar më herët edhe ministri i Brendshëm, Taulant Balla, duke u shprehur se bashkëpunimi i policisë me SPAK është i shkëlqyer dhe se nuk ka pasur dekonspirim në operacionet e Policisë së Shtetit dhe Prokurorisë së Posaçme.