Policia e Serbisë interviston të dyshuarin Millan Radoiçiç për vrasjen e Ivanoviçit

Ministria e Brendshme e Serbisë tha se policia, me kërkesë të Prokurorisë për Krim të Organizuar, ka intervistuar Millan Radoiçiç në lidhje me njohuritë e tij për vrasjen e politikanit serb, Oliver Ivanoviç, në Veri të Mitrovicës, raporton RFE.

“Policia ka marrë deklaratë nga M.R. në përputhje me kërkesën për të mbledhur informacionet e nevojshme për hetimet e vrasjes së udhëheqësit të Iniciativës qytetare Liria, Demokracia dhe Drejtësia,” thekson Ministria e Brendshme e Serbisë .

Prokurori special i Kosovës, Sylë Hoxha, ka konfirmuar për RFE se autoritetet në Kosovë janë në kërkim të nënkryetarit të Listës Serbe, Millan Radoiçiç, për rastin Ivanoviç.

Policia e Kosovës ka arrestuar të premten në veri të Mitrovicës tre persona të dyshuar në lidhje me vrasjen e Ivanoviçit, të cilëve më pas u është caktuar masa e paraburgimit prej 30 ditësh.

Millan Radoiçiç nuk ka qenë në banesën e tij gjatë këtij aksioni policor.

Radoiçiç, nënkryetar i Listës Serbe – parti politike në Kosovë – ka deklaruar të dielën se nuk ka lidhje me vrasjen e Ivanoviqit dhe se nuk do t’iu dorëzohet autoriteteve të Kosovës.

Ivanoviq është vrarë më 16 janar, 2018, para selisë së partisë së tij në Mitrovicën Veriore. Ai ishte kryetar i Iniciativës qytetare Liria, Demokracia dhe Drejtësia.