Policia tërhiqet nga veriu, Zv/Komandanti: Po operojmë me 50% të efektivëve

Janë  tërhequr tash policia, po operojmë me 50 për qind e policisë në veri! Kështu u shreh Zv/komandanti i Policisë për rajonin e veriut, Veton Elshani, duke konfirmuar se në ditët në vijim mund të ketë një vendim për zvogëlimin e pranisë së policisë, aty ku situata paraqitet e qetë dhe përreth objekteve të komunave vazhdojnë të qëndrojnë pjesëtarë të Policisë së Kosovës, por edhe trupa të KFOR-it..

Në kuadër të zotimeve për shtensionim të situatës në veri, pas takimit mes përfaqësuesve të KFOR-it, Policisë së Kosovës dhe EULEX-it, e ku janë diskutuar masat e shtensionimit në veri, Zv/Komandanti i Policisë për rajonin e veriut, Veton Elshani, e konfirmon se në ditët në vazhdim mund të ketë një vendim për zvogëlim të prezencës policore

“Atë që mund të konfirmoj është se Drejtori i Përgjithshëm i Policisë e ka formuar një grup pune, pjesë e të cilit jam edhe unë. Vendimi do të merret pas konsultimeve me partner ashtu si e parasheh edhe marrëveshja. Kështu që po, në ditët në vijim do të kemi me siguri një vendim që do të merret nga ana e drejtorit të përgjithshëm të Policisë, pra nga ana jonë dhe nga partnerët e tjerë,” tha Veton Elshani duke saktësuar se numri i policëve në veri është i mjaftueshëm dhe janë të gatshëm të ofrojnë siguri në këtë pjesë.

Duke filluar prej sot, fillon zvogëlimi i pranisë së Policisë së Kosovës në dhe rreth objekteve komunale në veri të Kosovës, pas vlerësimit të përbashkët nga Policia e Kosovës, EULEX-i dhe KFOR-i, se situata në veri është e mirë.

Ndryshe, në takimin e 10 korrikut në Bratislavë ishte arritur dakordësimi për zvogëlim në masën 25% të prezencës policore.