Pranon humbjen e 6 Marsit dhe gënjen, Basha: Do mbajmë përgjegjësi, që nga unë i pari!
Në Grupin Parlamentar nuk pranoi se ka përgjegjësi dhe as të jap dorëheqje, por sot Kryetari i shkarkuar i Partisë Demokratike, Lulzim Basha, e ka pranuar humbjen e zgjedhjeve të pjesshme vendore të 6 marsit ndërsa gënjeu duke theksuar se do të mbajnë përgjegjësi të gjithë, duke nisur nga ai.
Pse gënjeu?! Partia që e mbrojti duke derdhur gjak demokratësh me 8 Janar po i shkërmoqet para syve, dhe sot ai prioritet i jep një Raporti të Komisionit Hetimor të Inceneratorëve kur edhe ai vet e din se nuk do të votohet ashtu si dhe “nami me naftën”, për të cilat çështje kërkoj vëmendje, sepse, sipas tij, procesi i reflektimit nisi dhe do të vazhdojë
“Ka patur një mbledhje të grupit të deputetëve që një ditë më pas, një mbledhje të grupit të kryetarëve, Kolegjin e Kryetarëve, do të vazhdojë me mbledhjen e Kryesisë. Pra jemi në një proces të thellë reflektimi pas të cilit padiskutim do të marrim përgjegjësitë nga unë i pari,” tha sot Lulzim Basha duke gënjyer edhe ata 3-4 njerëz që i kanë ngelur në parti pa i thënë “jep dorëheqje” ndërsa u pyet nëse është i gatshëm të votëbesohet, ai sikur se Putin për Rusinë, tha se është i gatshëm të bëjë çdo gjë në interesin e PD.
“Nëse unë tani paragjykoj se çfarë do të ndodhë pa folur me bashkëpunëtorët, me njerëzit. Aktualisht që flasim kryetarët e degëve kanë kontakt me strukturat në bazë, edhe deputetët po kështu. Pra, ne jemi në një proces reflektimi dhe që reflektimi të bëhet ashtu siç duhet duhet në radhë të parë të respektojmë ata njerëz të cilët kanë mendimet e tyre, sjellin mendimet e të tjerëve. Prandaj jemi në një proces që nisi që ditën pas 6 marsit, një proces që vazhdoi ditën tjetër dhe do të vazhdojë në ditët e ardhshme.”
Deri dje, Lulzim Basha dhe Kryetarët e Degëve që kishte urdhëruar deklaronin se zgjedhjet janë vjedhur, por sot ai foli ndryshe:
“Pra, jemi në një proces reflektimi të brendshëm, disa prej tyre kanë kërkuar edhe analizë specifike për 6 bashkitë. Ju siguroj që demokratët do të marrin në dorë fatet e tyre, Partia Demokratike do të dalë nga ky proces e fortë dhe e bashkuar. Ky është synimi dhe në funksion të saj që padiskutim që detyra dhe përgjegjësia e parë është e imja dhe unë jam i gatshëm të ndërmarr çdo hap që Partia Demokratike të jetë e fortë, e bashkuar dhe të dali nga 6 marsi, nga humbja e 6 marsit të mos humbi mësimin e madh të 6 marsit që është domosdoshmëria për të qenë sa më të fortë dhe sa më të bashkuar përballë këtij regjimi,” tha ky politikan që nuk ka lidhje me politikën duke theksuar se procesi i reflektimit ka nisur por vëmendje duhet kushtuar Raportit të Komisionit Hetimor për Inceneratorët që sot diskutohet në parlament dhe nami që po bëhet me naftën.
“Sot po diskutohet për Komisionin e Inceneratorëve, shpresoj t’i japin një vëmendje se është bërë gjithë ajo punë dhe e meriton, Partia Demokratike, anëtarët tanë të komisionit, qytetarët e meritojnë transparencën në Komisionin e Inceneratorëve. Ndërkohë po bëhet nami me naftën dhe i pari i qeverisë ia ka mbathur për në Dubai. Të merremi me këto. Procesi i reflektimit nisi dhe do të vazhdojë.”
Ndryshe, përkundër antimbledhjes që i bëri Grupit Parlamentar duke mbledhur ca kryetar të bindur të degëve, mësohet se Lulzim Basha sërish ka thirrur deputetët në një mbledhje për të shtunën në orën 11:00.
