Presidenti polak vë veton ndaj ligjit për përmirësimin e të drejtave të çifteve të të njëjtit seks

Presidenti polak sot vuri veton ndaj dy projektligjeve që do të kishin futur në zbatim të ashtuquajturat “kontrata bashkëjetese” për çiftet e të njëjtit seks. Vendimi ndaloi një përpjekje për të përmirësuar situatën e çifteve të të njëjtit seks në Poloni, një nga anëtarët e paktë të Bashkimit Evropian që ende nuk garanton pothuajse asnjë të drejtë për personat LGBT, raporton Agjencia e lajmeve Reuters.

Kryeministri Donald Tusk mori detyrën në vitin 2023 me një premtim për të reformuar ligjet e abortit dhe të drejtat LGBT. Megjithatë, ai pengohet nga përçarjet brenda koalicionit të tij pro-evropian, si dhe nga fuqia e vetos së Presidentit nacionalist Karol Nawrocki.

Projektligjet mbi statusin e personit më të afërt dhe kontrata e bashkëjetesës do t’u lejonin dy të rriturve të rregullonin pronën e tyre të përbashkët, qasjen në informacionin mjekësor ose organizimin e një funerali përmes një kontrate.

Propozimet u mbështetën nga i gjithë koalicioni qeverisës, përfshirë partinë konservatore PSL. Ata kishin refuzuar më parë iniciativa të ngjashme nga frika se ato do të kërcënonin institucionin e martesës. Megjithatë, Nawrocki, një aleat i partisë nacionaliste të opozitës Ligj dhe Drejtësi, PiS, tha se propozimet shkuan shumë larg.

Mbrojtja e “statusit të veçantë të martesës”

“Këto propozime krijojnë një institucion të ri dhe të formalizuar brenda së drejtës familjare, duke ofruar një gamë të gjerë të drejtash të ngjashme me ato të martesës,” tha presidenti përmes një videomesazhi.

“Si mbrojtës i Kushtetutës, nuk mund të pranoj një zgjidhje që do të çonte në humbjen e statusit të veçantë të martesës. Ajo përkufizohet në Nenin 18 të Kushtetutës si një bashkim midis një burri dhe një gruaje nën mbrojtjen dhe kujdesin e Republikës së Polonisë.”

Donald Tusk reagoi ashpër përmes rrjett social X ndaj vendimit të presidentit:

“Vetoja e presidentit është një shprehje përbuzjeje për njerëzit dhe të drejtën e tyre për lumturi dhe një jetë normale.”

Për të anashkaluar veton, qeverisë i duhet një shumicë prej tre të pestash, me të paktën gjysmën e anëtarëve të parlamentit të pranishëm. Duke pasur parasysh se opozita nacionaliste kundërshton ligjet, një rezultat i tillë është praktikisht i pamundur.

Komisionerja e qeverisë për barazi, Katarzyna Kotula, tha se vendimi i Nawrockit kishte lënë pas dore dy milionë njerëzit që jetonin në marrëdhënie informale në Poloni. Tani, tha Kotula, do të përqendrohej në sigurimin e të gjitha të drejtave dhe përfitimeve të disponueshme për martesat e të njëjtit seks të lidhura jashtë vendit.

Ndryshe, Polonia u detyrua t’i njihte martesat e të njëjtit seks pas vendimit të Gjykatës së Drejtësisë të Bashkimit Evropian.