Presidenti Trump: Virusi ka kaluar pikun në SHBA!

Presidenti i SHBA, Donald Trump, tha se Shtetet e Bashkuara kanë kaluar pikun e rasteve të reja me koronavirus dhe se parashikohet që disa shtete të rihapen këtë muaj.

Duke folur nga Shtëpia e Bardhë, Presidenti Trump tha se udhëzimet për rihapje do të bëhen të ditura të enjten, pasi të flasë me guvernatorët.

“Ne do të jemi tejkaluesit, të gjithë ne,” tha presidenti duke shtuar:

“Ne duam t’i kthehemi shtetit tonë sërish.”

Deri më tani, SHBA ka raportuar për 640.000 raste të konfirmuara dhe 30.800 të vdekur si pasojë e sëmundjes COVID-19, që shkakton koronavirusi.

“Të dhënat tregojnë se në nivel kombëtar, ne kemi kaluar pikun e rasteve të reja. Shpresojmë se kjo do të vazhdojë dhe ne do të vazhdojmë të bëjmë përparim,” tha Presidenti Trump.

I pyetur pse Shtetet e Bashkuara kanë një numër kaq të madh të shkallës së vdekjeve, Presidenti Trump ka akuzuar shtetet tjera, duke thënë se po gënjejnë për shifrat e vërteta të vdekshmërisë.

“Vërtet dikush iu beson shifrave të disa vendeve?” tha ai duke përmendur Kinën.

Me këtë rast ai tha se është duke analizuar raporte të paverifikuara që tregojnë se koronavirusi ka dalë nga një laborator në Wuhan dhe jo nga tregjet e kafshëve.

Mediat amerikane kanë raportuar se ambasada amerikane në Pekin ka ngritur shqetësime për sigurinë e dy laboratoreve në Wuhan. Megjithatë, raporton RFE, udhëheqësi i Shefit të Stafit, Mark Milley, tha se shërbimet e inteligjencës amerikane besojnë se virusi mund të jetë zhvilluar në mënyrë të natyrshme.

Deri më tani nga koronavirusi janë infektuar më shumë se 2 milionë persona.