Presidentja e Kosovës: Dëshmorët e UÇK-së vunë themelet e shtetit!

Dëshmorët e UÇK-së vunë themelet e shtetit, prandaj edhe nderimi për ta nuk është i mjaftueshëm asnjëherë, tha Presidentja e Kosovës, Vjosa Osmani pasi bashkë me kryetarin e komunës, Skenderaj, Bekim Jashari, kanë bërë homazhe në Kompleksin Memorial të Dëshmorëve në Marinë.

“Sot sërish së bashku me kryetarin e Skenderajt po nderojmë heroizmin e të gjithë dëshmorëve të UÇK-së, atyre që e bënë themelet e shtetit tonë dhe dhanë më të shtrenjtën e tyre në mbrojtjen e atdheut. Kurrë nuk është e mjaftueshme për të treguar nderimin tonë për ta. Prandaj sot e bëjmë këtë nderim dhe përkujtojmë heroizmin e tyre,” tha Presidentja Vjosa Osmani duke përfunduar:

“Lavdi të gjithë heronjve të kombit tonë!”

Ndërsa kryetari i komunës Skenderaj, Bekim Jashari, tha se vetëm të bashkuar mund të ndërtohet vendi dhe të jetësohet amaneti i dëshmorëve.

“Ne sot nderuam të kaluarën tonë me shumë vuajtje dhe sakrificë aq sa e dhimbshme edhe krenare. Një ideal brez pas brezi. Pra, këtë amanet të dëshmorëve mund ta realizojmë vetëm të bashkuar dhe duke ndërtuar vendin tonë,” tha Bekim Jashari

Fillimisht Vjosa Osmani dhe Bekim Jashari kanë vizituar Kullën e Ilaz Kodrës.