Presidentja e Kosovës: Miqësia me SHBA-në, testament i rrënjosur thellë!

Në shënimin e Ditës së Presidentit Amerikan, Presidentja Vjosa Osmani në prani të Ambasadori i SHBA-së në Kosovë, Jeff Hovenier tha se Ish-Presidenti i SHBA-së, Bill Clinton, ishte bërë zë i Kosovës, në kohën kur dhuna ndaj nesh kishte arritur në shkallën e gjenocidit.

Presidentja Vjosa Osmani foli edhe për presidentin Biden, angazhimi i të cilit për Kosovën ka nisur që herët, për të vazhduar edhe si nënpresident, por edhe tani si president i SHBA-së, duke dëshmuar si një mik i madh i vendit dhe popullit tonë.

“Mbështetja e presidentit Biden është testament i vërtetë, i rrënjosur thellë në marrëdhëniet tona,” tha Presidentja e Kosovës, Vjosa Osmani, në Sheshin “Bill Clinton” në Prishtinë.

Hovenier: Klintoni lider i jashtëzakonshëm, ka marrë vendime të guximshme

Ambasadori i SHBA-së në Kosovë, Jeff Hovenier, tha se është i nderuar që, po merr pjesë në ngjarjen që i kushtohet Ditës së Presidentit Amerikan, në Sheshin “Bill Clinton”, duke falënderuar kontributin e Presidentes Vjosa Osmani.

Duke kujtuar fjalët e Ish-Presidentit Clinton përmes të cilave shprehet arsyeja e angazhimit të tij për popullin e Kosovës gjatë luftës së fundit dhe falënderimin e tij për popullin kosovar për respektin e treguar ndaj tij, Ambasadori Hovenier tha se nga të gjithë presidentët amerikanë, qoftë ata para, qoftë ata pas tij, Clintoni ishte lider i jashtëzakonshëm, që ka marrë vendime të guximshme.

Sot në Shtetet e Bashkuara shënohet Dita e Presidentëve, që u bë fillimisht festë kombëtare në vitin 1879 për nder të ditëlindjes së Presidentit të parë amerikan, George Washington, më 22 shkurt.

Afro një shekull më pas në vitin 1968, Kongresi miratoi një ligj sipas së cilit disa festa kombëtare nuk do të shënoheshin në data të caktuara, por të hënave duke u dhënë kështu mundësi qytetarëve të kishin dhe ditë pushimi.

Fillimisht, Dita e Presidentëve festohej vetëm në kryeqytet, por në vitin 1885 ajo u shtri edhe në pjesën tjetër të vendit.

Sot, Presidentja e Kosovës, Vjosa Osmani, dhe Ambasadori i SHBA-së në Kosovë, Jeff Hovenier, shënuan Ditën Ndërkombëtare të Presidentit të SHBA-së me një aktivitet te shtatorja e Bill Clintonit në Prishtinë.

Kjo ditë u shënua me iniciativën e Shoqatës Historike të Shtëpisë së Bardhë dhe Ambasadorit amerikan Jeff Hovenier.