Presidentja Vjosa Osmani: Vizioni i Fehmi Aganit për Kosovën, frymëzim për brezat

Vizioni dhe trashëgimia e Fehmi Aganit për Kosovën do të jetë frymëzim për brezat, tha Presidentja e Kosovës, Vjosa Osmani, në 24 vjetorin e vrasjes duke u zotuar se sjellja e autorëve të krimit para drejtësisë do jetë përkushtim i vazhdueshëm!

“Sot e kujtojmë me respekt akademik Fehmi Aganin, figurën emblematike të lëvizjes për lirinë e Kosovës, njeriun që përkushtimin e tij ndaj dijes e arsimit e kombinoi me aktivitetin politik, duke qenë dorë e djathtë e presidentit historik, dr.Ibrahim Rugova, me të cilin u angazhua deri në vdekje në përmbushjen e idealit për Kosovën shtet të pavarur,” tha Presidentja e Kosovës duke përkujtuar 24 vjetorin e vrasjes së Akademik Fehmi Aganit duke shtuar:

“Më 6 maj të vitit 1999, në agun e lirisë, vizionari e përbashkuesi, akademik Agani u vra mizorisht nga forca të regjimit gjenocidal të Serbisë. Vizioni dhe trashëgimia e tij për Kosovën do të jetë frymëzim për brezat,” tha Presidentja e Kosovës, Vjosa Osmani, duke u zotuar se kujtimi për akademik Aganin do të jetë i përhershëm, kurse sjellja e autorëve të krimit para drejtësisë përkushtim i yni i vazhdueshëm!