Prezantohet “Arkivi online”, tashmë çdo dokument mund të merret nga shtëpia
Dokumentet arkivore tashmë mund të merren online, përmes aplikacionit novator të prezantuar sot nga Drejtoria e Përgjithshme e Arkivave. Duke prezantuar modulin “Arkivat online”, Drejtori i Përgjithshëm i Arkivave, Dr. Ardit Bido bëri edhe blerjen e parë online të kopjeve të dokumenteve.
“Ky është një prej kulmimeve të strategjisë së digjitalizimit që kemi dy vjet për të cilin po punojmë. Fakti që module të ngjashme kanë vetëm vendet më të zhvilluara botërore dhe asnjë nga vendet e rajonit na vendos në pararojë në Ballkan për të shërbyer sa më shpejtë dhe sa më mirë studiuesit shqiptarë dhe të huaj, duke i dhënë hov zhvillimit të kërkimit shkencor në vend,” tha Ardit Bido.
Zv/kryeministrja Senida Mesi duke theksuar se shërbimi më i shpejtë i çdo qytetari është prioritet i qeverisë shqiptare, për “Arkivat online” u shpreh: “Ky aplikacion mundëson që në çdo kohë të mund ti shërbehen studiuesit, pavarësisht nëse zyrat shtetërore janë të hapura a të mbyllura.”
Për rëndësinë e risisë “Arkivat online” foli edhe Drejtoresha e Inovacionit të Agjensisë Kombëtare të Shoqërisë së Informacionit, Romina Kostani ndërsa Dekani i Fakultetit të Historisë dhe Filologjisë Prof. Dr Sabri Laçi falënderoi Drejtorinë e Përgjithshme të Arkivave dhe vlerësoi bashkëpunimin e rëndësishëm mes dy institucioneve duke evidentuar hapjen e Masterit Profesional në Arkivistikë këto 10 vitet e fundit ku mbas diplomimit janë angazhuar të gjithë të diplomuarit në zyra të ndryshme të Arkivave të vendit.
Ndryshe, përmes aplikacionit “Arkivat online”, nga çdo vend i botës, në çdo orë të ditës, studiuesit mund të porosisin dokumentet që iu duhen dhe pasi të kryejnë pagesën përkatëse do të mund t’I marrin brenda 1-5 ditë.
