Pritet stuhi e re, në Slloveni dhe pjesën më të madhe të Kroacisë

Agjencia sllovene e mjedisit, Arso, sot ka paralajmëruar mot me stuhi në gjithë territorin e Sllovenisë, në periudhën në mes orës 14:00 dhe 23:00, duke dhënë dhe alarmin portokalli. Sipas Ars, pritet një mot me breshër, erëra të forta dhe shkreptima.

Ndërsa Enti Hidrometeorlogjik i Kroacisë, DHMZ, sot jep alarmin portokalli duke paralajmëruar mot me stuhi dhe shkreptima gati në gjithë vendin, me përjashtim të rajonit të Kninit dhe Dubrovnikut ku ky alarm bëhet për shkak të valës së nxehtit.

DHMZ parashikon mot me stuhi në rajonin e Riekës pas orës 12:00, në Kroacinë qendrore pas orës 14:00 ndërsa në rajonin e Osiekut pas orës 16:00.

Në veri të rajonit të Splitit parashikohet një mbrëmje me reshje lokale të shiut dhe shkreptima.

Ndërkohë për dy stuhitë që përfshinë pjesën më të madhe të Kroacisë në tre ditët e kaluara, janë angazhuar 12.348 zjarrfikës me 4.502 makina në sanimin e pasojave, dhe deri më tani kanë arritur të realizojnë 4.293 ndërhyrje, ndërkohë po punohet në largimin e pemëve të shumëta që kanë bllokuar rrugët si dhe rregullimin e shumë shtëpive që kanë mbetur pa çati si pasojë e stuhisë.