Projekti shpopullues i Edi Ramës, PD: Në Universitetin e Shkodrës 40% më pak studentë!

Projekti shpopullues i Edi Ramës për Shqipërinë dhe rrënues për arsimin, po e prek çdo prind, student, mësues dhe pedagog, thekson Partia Demokratike duke reaguar përmes drejtuesit politik të Qarkut Shkodër, Helidon Bushati, ndërsa e konsideron të trishtë ditën e sotme kur në Universitetin e Shkodrës janë regjistruar 40 studentë më pak.

“E ardhmja e vendit është marrur peng nga padija e kësaj qeverisje. Kurrë më shumë se sot, e ardhmja e vendit tonë nuk ka qënë në pikëpyetje,” thekson Helidon Bushati duke shtuar se Partia Demokratike ka një plan konkret për rikthimin e studentëve në auditore, për një sistem arsimor meritokratik dhe cilësor.

Ndryshe, sipas të dhënave nga INSTAT, në vitin 2021, në auditorë ka rreth 124 mijë studentë, 5% më pak se në vitin 2020 ndërsa 12% më pak studentë në krahasim me vitin 2017.

Reagimi:

Universiteti i Shkodrës pëson tkurrjen më të madhe të studentëve në historinë e tij. Tkurrje me 40% e numrit të studentëve të regjistruar, një katastrofë e vërtetë!

Projektin shpopullues të Edi Ramës për Shqipërinë dhe rrënues për arsimin, po e prek çdo prind, student, mësues dhe pedagog. Shifrat janë këmbana që bien fort, sot është një ditë e trishtë për Universitetin e Shkodrës.

E ardhmja e vendit është marrur peng nga padija e kësaj qeverisje. Kurrë më shumë se sot, e ardhmja e vendit tonë nuk ka qënë në pikëpyetje.

Fjalët e At Zef Pllumit për vitet e errëta të diktaturës janë më aktuale se kurrë:

“Shqipënia e terrorizume kishte ranë në koma, njerëzit e ditun nuk dishin ma kurrgja dhe njerëzit e paditun kishin në dorë gjithçka, atë që nuk dihej.”

Partia Demokratike ka një plan konkret për rikthimin e studentëve në auditore, për një sistem arsimor meritokratik dhe cilësor. Një plan i detajuar që ka marrë vemëndjen e pedagogëve të Universitetit të Shkodrës dhe studentëve. Një plan konkret dhe jo mashtrime e premtime boshe.