Protesta Kombëtare, Berisha: Ne do vazhdojmë gjer në largimin përfundimtar të kësaj të keqe të madhe!

Duke falënderuar protestuesit për pjesëmarrje në Protestën Kombëtare të 8 Majit, Kryetari i Partisë Demokratike, Sali Berisha, tha se shqiptarët u janë përjetë mirënjohës për këtë sakrificë që ne do ta vazhdojmë gjer në largimin përfundimtar të kësaj të keqe të madhe.

Mediat ndërkombëtare i bënë jehonë protestës sonë, tha Kryetari i Partisë Demokratike sot në bashkëbisedim me qytetarët në rrjetet sociale ndërsa shtoi se Edi Rama tashmë në rreth të kuq, është gati të shesë lëkurën e vet.

“Së pari, dëshiroj të përulem me nderimin më të madh para atyre dhjetëra mijëra që u bashkuan dje në rrugët dhe sheshet e Tiranës në një kryengritje madhështore për të mbrojtur nderin, dinjitetin e çdo shqiptari.
Për të mbrojtur ëndrrën më të bukur të shqiptarëve, integrimin në Europë.
Për të mbrojtur të ardhmen e tyre në Shqipëri.
Ishte protesta, kryengritja paqësore e tetë, me një jehonë të jashtëzakonshme botërore.
I ndiqni lajmet se si guximi, kurajo, sakrifica juaj u shndërrua në lajm botëror. U përcoll me dashamirësi absolute.
Betejë si në legjendë kundër dyshes tashmë famëzezë në mbarë botën, Rama-Balluku. Kundër vjedhjes dhe plaçkitjes së qytetrëve shqiptarë.

Me këtë protestë, me këtë kryengritje, me këto sakrifica, ju u provoni shqiptarëve se qëndroni të pamposhtur para një të keqe që po e gërryen këtë komb sa asnjë pushtim tjetër në tërë historinë e tij.
Para një të keqe, para një dysheje Rama-Balluku se po plaçkit këtë komb më shumë se çdo pushtues tjetër në historinë e tij.
Para një regjimi që përfaqëson narkoshtetin e parë dhe të vetëm në Europë.
Prania juaj dje në bulevardin e Tiranës ishte prozhektori i madh i shpresës për të gjithë shqiptarët që ende nuk guxojnë të dalin nga emocionet e frikës.
Për të gjithë shqiptarët që duan që Shqipëria të integrohet me dinjitet në BE.
Pra, ju keni qenë dje në bulevardin e madh të Tiranës amaasadorët më të shkëlqyer, përfaqësuesit më dinjitozë, elita e vërtetë e kombit, e ndërgjegjes së tij para çdo shqiptari dhe para partnerëve, miqve të Shqipërisë në mbarë botën.
Edhe njëherë lexoni, shihni mediat e tyre se çfarë jehone pozitive i kanë bërë.
Dhe për një moment do u lutesha të imagjinonit sikur ne të heshtnim, sikur ne të mos ishim në përballje dhëmb për dhëmb me regjimin se çfarë gjëme e vërtetë do të ishte për Shqipërinë dhe shqiptarët.
Se si do ta shfrytëzonin këtë racistët antishqiptarë siç u shprehën tre javë më parë se shqiptarët janë të ambientuar me vjedhjen dhe korrupsionin.
Imagjinoni ju, në rast se opozita nuk do ishte në përballje të egër, por do dëgjonte vuvuzelat mjerane të Edi Ramës.
Këta kritizerë amoralë të cilët në vend se të bashkohen me popullin opozitar, në mburojë të Edi Ramës, bëjnë gjithçka për të dekurajuar protestën e tij.
Pra miq, edhe njëherë, bekimin e Zotit.
Shqipëria u është përjetë mirënjohëse.
Shqiptarët u janë përjetë mirënjohës për këtë sakrificë që ne do ta vazhdojmë gjer në largimin përfundimtar të kësaj të keqe të madhe.
Të këtij njeriu që ka vendosur moral të regjimit të tij, moralin e etërve të tij xhelatë.
Të këtij njeriu që bllokoi bulevardin e protestës paqësore për të treguar frikën dhe tmerrin që ka nga protestuesit.
Të këtij njeriu që shërbehet nga horra, kriminelë, plaçkitës në të gjitha funksionet e narkoshtetit të tij.
Por ne qëndrojmë dhe do të qëndrojmë të pamposhtur,” tha Sali Berisha duke fol dhe për jehonën e Protestës Kombëtare të opozitës nga mediat ndërkombëtare.

“Mos u ndikoni nga mediat e kontrolluara nga Rama, po ndiqni pak mediat botërore.
Shiko çfarë jehone të jashtëzakonshme i kanë dhënë, qoftë dhunës policore ndaj kryengritësve paqësorë, por qoftë dhe shkaqeve themelore të kësaj kryengritje.
Natyrisht, duhet të jemi të vetëdijshëm se rruga paqësore nuk është një rrugë e shpejtë, si ndeshja e stadiumit, por është një rrugë e sigurtë,” tha Kryetari i Partisë Demokratike, Sali Berisha, duke siguruar në fund:
“Edi Rama është në rreth të kuq. Është i gatshëm të kishte gjallë të ndjerën nënë, ta shiste dhe atë për lëkurën e vet. Por, le të shesë çdo gjë, shqiptarët do t’i tregojnë vendin e atij. Me asgjë nuk do mund të blejë mburojë për lëkurën e vet.”