Protesta të fuqishme, Berisha: S’lejojmë që një aventurier të shkelmojë ëndrrën tonë!

Për Kryetarin e Partisë Demokratike, Samiti i BE që fillon nesër është historik meqë aty i ofrohet një vendi në luftë, por që po lufton për Europën, për lirinë, statusi kandidat dhe sfidohet haptas agresori rus ndërsa foli dhe për shantazhin që i bëri dje hapur Presidenti i Serbisë, Aleksandar Vuçiç, për të cilin Berisha tha se ai mund të mos shkonte sepse ai nuk zbaton sanksionet e BE-së ndaj Rusisë, por Edi Rama nuk shkon vetëm e vetëm se nuk shkon Aleksandar Vuçiç, vasal i hapur i tij.

“Edi Rama paralajmëroi që do ndryshojë drejtimin. Faktikisht dje shpalli ndryshimin e drejtimit. Mes Brukselit dhe Beogradit zgjodhi Beogradin. Zgjodhi Ballkanin ruso-serb. Sikur këtu të mos ishte një popull që ka aspiratat më të larta për integrimin europian. Sikur këtu të mos ishte një popull që ka sakrifikuar më shumë ndoshta se çdo komb tjetër për të ruajtur demokracinë e tij, vokacionin e tij perëndimor. U nis turist pasi shpalli se atje nuk kemi pse shkojmë. Një ftesë në një moment historik. Samiti që mblidhet më 23-24 qershor në Bruksel është historik sepse aty i ofrohet një vendi në luftë, por që po lufton për Europën, për lirinë, statusi kandidat dhe sfidohet haptas agresori rus. Ky moment historik do ishte një nderim i madh për shqiptarët, të përfaqësoheshin aty.

Çfarë është bojkoti? Bojkoti i këtij akti është haptas përçmim ndaj tij, disaprovim ndaj këtij akti, është haptas rreshtim në krahun tjetër. Vuçiç mund të mos shkonte sepse ai nuk zbaton sanksionet e BE-së ndaj Rusisë. Po Edi Rama? Nuk shkon vetëm e vetëm se nuk shkon Aleksandar Vuçiç, vasal i hapur i tij, preteksti se vetoja bullgare ka bllokuar,” tha Sali Berisha në Tryezën e prganizuar nga PD “Të rikthejmë Shqipërinë në rrugën europiane” ndërsa paralajmëroi procesin në zgjidhje të kësaj vetoje.

“Për zgjidhjen e vetos bullgare u mblodhën më të mëdhenjtë e Europës dhe i dhanë një zgjidhje jo ideale, por të sigurt. E cila mund të mos sjellë rezultatin në këtë samit, por e ka të sigurt rezultatin në samitin tjetër. Komisioni Europian dhe vendet anëtare të BE i kanë dhënë Shqipërisë ndihmën më të madhe financiare të gjithanshme që vendi ka njohur në ekzistencën e tij.”

Në fund, Kryetari i PD, Sali Berisha, paralajmëroi protesta për ti dal zot fatit tonë dhe mos të lejojmë që një aventurier si Edi Rama të shkelmojë mbi identitetin tonë.

“Çdo ditë që ne nuk i dalim zot fatit tonë, por lejojmë që një aventurier i tillë të shkelmojë mbi identitetin tonë, mbi ëndrrën tonë ne bëhemi përgjegjës. Mendoj që ne duhet të thërrasim një protestë të fuqishme. Ky është një motiv në një farë mënyrë ekzistencial për kombin tonë. Nuk mundet kurrë njeri i shitur, i pashitur, cilido qoftë ai, të luajë me fatin tonë në këtë mënyrë. Edi Rama ka shndërruar Tiranën në Beogradin e vogël. Ne jemi kryeqyteti i Shqipërisë dhe i shqiptarëve”.