Protestëfikësit!
nga Agim Popoci
Mediat në shërbim të Sigurimit të Shtetit kot u angazhuan dhe u bënë pis në prag të protestës së 20 shkurtit për t’i bindur shqiptarët se askush nuk do të dal në protestën e organizuar nga një “non grata”, pas mbështetjes që Sekretari amerikan i Shtetit, Antony Blinken, i shprehu Kryeministrit Edi Rama!
Pjesëmarrja e madhe në këtë protestë u pasua me Planin B të kësaj organizate kriminale që për të shuar madhështinë e saj, ndonëse njerëzit kishin filluar të shpërndahen, shpiku ca të rinj që ranë në rrjetën e ca patronazhistëve me kapuç, për t’i thënë miletit se sa e dhunshme që ishte protesta!
Përkundër përpjekjes së mediave me pronar sipërmarrësit që Edi Rama ka në krah, të gjithë ishin të qartë se nëse kjo protestë ishte e dhunshme atëherë përplasja e tifozëve në derbin Tirana-Partizani është luftë, ndërsa protesta e 21 janarit që organizoi Kryeministri i shquar i Blinkenit kundër ryshfetit të Ilir Metës është luftë botërore!
Meqë shumë shpejtë u qartësua se Sigurimi i Shtetit kot mori vrull ndonëse mediat vazhdonin me propagandën e tyre banale, u shfaqën batonistat e aleancës së qelbësirave me Planin C, për ti dhënë goditjen finale kësaj proteste të suksesshme opozitare me idenë se do ta fikin përfundimisht!
Duke e pranuar se protesta ishte madhështore, në të gjitha debatet televizive u shpërndanë këta morra të kuq me goditjen e vetme të përqendruar: Kush do të jetë kandidat për Kryeministër i Federatës së Opozitës në zgjedhjet e vitit 2025!
Pa i lënë hapësirë arsyetimit se ende është herët dhe se këtë e parashikon edhe Statuti i PD, Protestëfikësit e Sigurimit të Shtetit e kishin në maje të gjuhës vetëm pyetjen mbi Emrin e kandidatit për Kryeministër, ose, A do të jetë ai vetë Sali Berisha!
Sikur kjo pyetje të bëhej natyrshëm në politikën shqiptare, sikur këta Protestëfikës të kishin pyetur edhe Edi Ramën pas protestës së 21 Janarit se kush do të jetë Kryeministri i koalicionit qeverisës, ndoshta kjo pyetje sot do të dukej e natyrshme edhe pse bëhet 17 muaj para zgjedhjeve; Por, kur kemi parasysh se këtë pyetje ata nuk guxonin t’ia bënin njeriut që i shërbenin për tu bërë Kryeministër edhe dy muaj para zgjedhjeve kur ai firmosi Marrëveshjen me Ilir Metën në Shkodër, atëherë ky altoparlant i Sigurimit të Shtetit bëhet më shumë se sa i neveritshëm!
Edhe kur një batonist shtrëngoi dhëmbët në prag të zgjedhjeve të vitit 2017 dhe e pyeti Edi Ramën se kush do të jetë kandidat për Kryeministër, Edi Rama që nuk kishte gris koalicionin me Liken dhe nuk kishte bërë ende dill me Lulzim Bashën, tha se “Kryeministri buron nga vullneti i popullit, ata zgjedhin partinë fituese dhe kryeministrin dhe koalicionin fitues. Se kush do jetë kryeministër këtë nuk e përcaktoj as unë dhe as Ilir Meta por vota e popullit.”
Po kur Kryeministri buron nga vullneti i popullit, pse sot duhet ta dinë anëtarët e Grupit Parlamentare të PD që bombardohen me pyetjen protestëfikëse, se kush do të jetë kandidat i opozitës për Kryeministër!
Nëse u tha se askush nuk do të dalë në protestë kur ai nuk i mbledhë dot as 100 vetë sa janë te Rruga e Shpresës; Kur u mbushë sheshi dhe u tha se Protesta ishte e dhunshme; Dhe, kur rezultoi se nuk ishte e tillë, pse Sigurimi i Shtetit mendon se aq lehtë mund ta fikë entuziazmin e kësaj proteste duke e degjeneruar me ndonjë mendim të cilitdo anëtar të Grupit Parlamentar të PD që mund edhe të bie në kurth!
Ç’rëndësi ka se kush nuk është dakord në Grupin Parlamentar të PD që Sali Berisha të bëhet kandidat për Kryeministër!
Apo, ç’rëndësi ka se kush është çmend nga opozita që ti shpalos Planin e Federatës së Opozitës tek Fevzo, Grida ose largqoftë Kol Balla edhe kur një plan i tillë jetë hartuar, dhe jo vetëm sot kur asgjë nuk dihet!
Pavarësisht komplimenteve që i dha Blinken, Kryeministrit të shquar të Shkodrës, Himarës dhe gjithë Shqipërisë, sot shqiptarët janë më të qartë se kurrë se Edi Rama iu përkul Ilir Metës në vitin 2013 sepse sondazhet i tregonin qartë se ai nuk është fitues; E flaki në vitin 2017 sepse sondazhet i kuroi me marrëveshjen që bëri me bedelin e tij Lulzim Basha; Ndërsa në vitin 2021, ku gjithashtu sondazhet i thoshin se është humbës, ishte babai i Alexit ai që i mundësoi të gris marrëveshjen për Kodin Zgjedhor në sy të Yuri Kardashianit, për të pamundësuar krijimin e koalicioneve parazgjedhore, dhe për t’i mundësuar fitoren njeriut që nuk ka fituar deri më sot asnjë betejë zgjedhore; Madje as atë të zgjedhjes për Kryetar të PS që i kushtoi sa qimet e kokës!
Në fund, Edi Rama kot që llap dhe bënë sikur është adhurues i teknologjisë ndryshe nuk do ta aktivizonte këtë shpurë llumi medatik në operacionin e fikjes së jehonës së protestës me gjitha këtë vrull, sepse do ta kishte parasysh deklaratën epike të sipërmarrësit teknologjik, filantropit dhe themeluesit të kompanisë “Amazon”, Jeff Bezos, që pagëzuesit të “Epokës Digjitale Shqiptare” Sali Ramë Berishës, po i shërben në mënyrë të paimagjinueshme:
“Djemtë e operacioneve speciale dhe zjarrfikësit në të gjithë botën e kanë këtë frazë të mrekullueshme. Ata thonë: ‘E ngadalshme është e qetë dhe e qetë është e shpejtë’, dhe është e vërtetë. Gjithçka që kam arritur në jetë ishte falë këtij qëndrimi.”
