Pse Aleksandar Vuçiç po godet gënjeshtrat dhe mashtrimet proserbe të Edi Ramës?!

nga Prof.Dr.Enver Bytyçi

Tutori i Edi Ramës, presidenti i Serbisë, Aleksandar Vuçiç dha një intërvistë në “The Rest is Politics” të ish-këshilltarit të Tony Blair në kohën e luftës në Kosovë, Alistair Campbell. Në këtë intervistë kreu i shtetit serb deklaroi se “Ballkani i Hapur ishte ideja ime, por ajo u ndërpre, sepse disa fuqi të mëdha europiane nuk e kishin “timonin në duar””!

Nëse ju kujtohet, Edi Rama nuk e pranoi kurrë se kjo iniciativë e Serbisë është e sivëllait të tij, Vuçiç. Madje në një nga samitet e Open Balkan, në Shkup, pati thënë se “Iniciativa është e imja” dmth e Edi Ramës. Me siguri që për këtë deklarim, ai do të duhej ta kishte marrë lejen e autorit, Aleksandar Vuçiç. Nëse po, pse presidenti i Serbisë “e tradhtoi” Edi Ramën dhe nxori sekretin e gënjeshtrës së tij?! A mos ishte ky një paralajmërim për “nxjerrjen e sekreteve të tjera” nga ana e Beogradit në adresë të kryeministrit të Shqipërisë?! Mos ndoshta Vuçiç është i pakënaqur me sivëllain e tij në Tiranë?!

Deklarata e kreut të shtetit të Serbisë provoi në këtë rast shumëçka.

Së pari, provoi se Open Balkan nuk ishte interes i Fuqive të Mëdha në Perendim, siç e patën propaganduar Rama dhe Vuçiç. Të dy këta dhe sidomos ky “karabushi” ynë, na thoshte vazhdimisht se psh “Amerika dhe Gjermania e mbështesin iniciativën e Ballkanit të Hapur”!

Ne thoshim jo, kjo nuk është e vërtetë dhe kemi shkruar aq shumë për faktin se as Gjermania as SHBA-të nuk ishin dakord me këtë iniciativë, ndonëse prania e Aleksandar Soros dhe ndonjë diplomati amerikan, si Escobar, na çonte në dilema.

Ne thamë atëherë se Open Balkan është interes rus. Në fakt ajo nismë u mbështet publikisht në vitin 2024 nga shefi i diplomacisë ruse, Sergei Lavrov. Pse Lavrov foli kaq vonë, ndërkohë që ai dhe Putin ishin prapa kësaj iniciative? Sepse Rama u detyrua ta shpallë Open Balkan “të vdekur”!

Në të ardhmen do të dalin fakte të padiskutueshme e të pakontestueshme, të cilat do ta provojnë këtë tezë ose hipotezë. Gradualisht po marrim vesh dhe do ta kuptojmë edhe më mirë më vonë se iniciativat serbe gjithnjë janë edhe iniciativa ruse dhe se kryeministri i Shqipërisë i ka shërbyer me zell axhendës së Beogradit dhe Moskës në Ballkan.

Së dyti, Open Balkan ishte mjeti dhe qëllimi i asgjësimit të Kosovës si shtet. Këtë e kemi thënë, e kemi shkruar dhe e kemi stërthënë e stërshkruar dhjetra herë në kohën dhe momentin e duhur. Natyrshëm, kur beson se një aksion politik e diplomatik në Ballkan shkon në shërbim të axhendës ruse e serbe, do ta kuptosh se kjo axhendë drejtohet kundër Kosovës dhe kundër shqiptarëve.

I vetmi që “nuk e kuptoi” këtë fakt ishte kryeministri i Shqipërisë, Edi Rama. Ai e mbrojti me fanatizëm iniciativën e Vuçiç për Open Balkan, e nisur në fillim si “Minishengeni Ballkanik”! Alternativa e Ramës gjatë gjithë kohës ishte “Ose përkrahni Ballkanin e Hapur, ose do të ketë luftë në Ballkan”! Nuk ishte rastësi fakti që kam shkruar që në vjeshtën e vitit 2019, se për Minishengenin Ballkanik u fol në margjinat e Asamblesë së Kombeve të Bashkuara në shtator 2019. Ishin Edi Rama, Aleksandar Vuçiq dhe Zoran Zaev, ata që vendosën përkrahjen e tij. Por pas një konsulte me ministrin rus të Punëve të Jashtme, Lavrov.

Mbrojtja që kryeministri i Shqipërisë i bëri Open Balkan ishte harbutshe. Ai luftoi me mish e me shpirt që ta bindë Europën dhe SHBA-të për ta mbështetur këtë iniciativë dhe nga ana tjetër e kërcënoi kryeministrin e Kosovës, Albin Kurti, pse ky i fundit qe aq i zgjuar dhe patriot, sa të mos pranonte varësinë e Kosovës nga Beogradi dhe Tirana e Edi Ramës, siç ndodhi me Hashim Thaçin në rastin e iniciativës për ndarjen e Kosovës. Kurti mbrojti tezën se “është më mirë të integrohemi në Tregun e Përbashkët Rajonal, ku operojmë me rregullat dhe vlerat e BE-së”. Ndërsa Rama i përgjigjej: “Ballkani I Hapur as nuk ndalet, as nuk mbyllet.

Kush i kundërvihet është i destinuar të zhgënjehet. Kush heziton është i destinuar të humbë kohë”! Me kundërvënien Rama kishte parasysh Albin Kurtin. Me hezitimin ai paralajmëronte presidentin malazez, Milo Gjukanoviç, si dhe Bosnje Hercegovinën. Në fakt edhe presidenti i Maqedonisë së Veriut ishte kundër ose së paku skeptik. Në fund u zhgënjyen Edi Rama dhe Aleksandar Vuçiç!

Aq aktiv ishte Rama në mbrojtjen e idesë së Ballkanit të Hapur, sa ai mori falenderime publike nga ana e presidentit të Serbisë, Aleksandar Vuçiç, i cili pati deklaruar se “Pa vendosmërinë dhe këmbnguljen e Edi ramës, Ballkani i Hapur do të ishte i pamundur”!

Rama dhe Vuçiç akuzuan asokohe Kurtin dhe refuzuesit ballkanikë të Open Balkan, si edhe partnerët perendimorë se këta, duke mos mbështetur këtë iniciativë, po kontribuonin për destabilizimin e rajonit. Siç e ka traditë, Rama e tragjidizoi situatën. Përdori në zhargonin e tij fjalët më ekstreme të destabilitetit, siç janë termat luftë, konflikt, gjakderdhje etj. Ndërkohë që edhe Vuçiç më me mençuri përdori termin “Ne nuk duam që rajoni ynë të përfundojë si Ukraina”. Kurse në prill 1922 kryeministri Rama njoftoi dhe zhvilloi atë që ai e quajti “Këshillimi Kombëtar” për pjesmarrjen ose jo të Shqipërisë në Ballkanin e Hapur. “Këshillimin kombëtar” e organizoi vetë Rama. Nuk ia besoi as OJQ-ve, të cilat ai i financon. Kjo e çoi në kosh besueshmërinë ndaj këtij testi.

Megjithatë Rama u mburr se ishte këshilluar me 500 mijë shqiptarë (vini re, as 499, as 501 mijë, por fiks 500 mijë) dhe se shumica e tyre “ishin pro lëvizjes së lirë të njerëzve e të mallrave në rajon”! Harxhoi kështu qindramijë euro nga buxheti i shtetit, me qëllim që të “provonte” se “shqiptarët ishin pro Open Balkan” të Serbisë!

Por menjëherë pas këtij sondazhi, kancelari gjerman, Scholz, i kërkoi kryeministrit shqiptar që ai të fokusohej te Procesi i Berlinit, duke nënkuptuar që të hiqte dorë nga Open Balkan.

Dy vjet më vonë, në shtator 2024, i ngarkuari i Gjermanisë për Ballkanin Perendimor, Manuel Sarrazin, u shpreh në Prishtinë se “Ballkani i Hapur u krijua për të anashkaluar Kosovën”! Pikërisht këtë synim të politikave anti-shqiptare të Beogradit e kishte zbuluar kryeministri i Kosovës, Albin Kurti, kur ai refuzoi kategorikisht pjesmarrjen e vendit të tij në këtë iniciativë. Kam debatuar me shumë analistë dhe politikanë të Kosovës e të Shqipërisë rreth kësaj teme. Milaim Zeka më thoshte në një rast se “Albini duhej të shkonte p.sh. në një samit të kësaj iniciative në Beograd, pa u ftuar”, dhe se Kosova nuk duhet të izolohet, term ky që u përdor nga Rama si presion i vazhdueshëm në të gjitha samitet që u bënë në rajon prej Novi Sadit e deri në Ohër e Tiranë. Nuk e di se si sot të gjithë këta përkrahës dhe propagandistë të zjarrtë të Ballkanit të Hapur mund të vazhdojnë të flasin për tezat e tjera anti-shqiptare të Edi Ramës vs Aleksandër Vuçiç.

Koha është ajo që na provon gjithçka! Mjer ata politikanë dhe shërbëtorë mediatikë të tyre që nuk e kuptojnë se vjen një ditë dhe do të duhet të japin llogari për qëndrimet e tyre. Lum ata që në qëndrimet e veta mbajnë parasysh vetëm një interes, interesin kombëtar!