Pse PS nuk shpallet organizatë terroriste!

nga Agim Popoci

Pas 9 vjet terrori shtetëror të Partisë Socialiste me në krye Edi Ramën, Kryetari i Grupit Parlamentar të PS, Taulant Balla, është i shqetësuar dhe dëshiron ta largoj nga Parlamenti, deputetin dhe Kryetarin e PD, Sali Berisha, sepse, sipas tij, na paska qenë sekretar partie dhe njeri i afërt me udhëheqjen e diktaturës komuniste.

Ky merak do të kishte bazë morale e ligjore sikur mos të ishte ky Taulanti i Fatos Nanos në shërbim të Edi Ramës, i cili në emër të Partisë Socialiste propozoi dhe votoi Gramoz Ruçin si kryetar të Parlamentit të Shqipërisë, ndonëse ishte jo vetëm si ish-sreketar partie i një qarku të rëndësishëm në diktaturën komuniste por dhe Ministër i Brendshëm i kësaj diktature, në kohën e të cilit u krye dhe masakra e 2 Prillit në Shkodër!

Meraku i Taos do të kishte kuptim edhe sikur ky të reagonte kur në krye të Komisionit të Ligjeve u zgjodh hetuesi i Sigurimit të Shtetit, Fatmir Xhafaj; Madje këtij hetuesi famëkeq në Rrethin e Krujës iu besua edhe Reforma e madhe në Drejtësi, për “suksesin” e të cilës Reformë u emërua Ministër i Brendshëm!

Dhe, para se ta qartësonte praninë e një sekretari partie të fakultetit në parlament, do të ishte e udhës që Reformën në Drejtësië nga një hetues i Sigurimit të Shtetit komunist ta bënte nul, dhe të shohin shqiptarët se si vepron një SPAK, KLGJ ose KLP kur Sigurimi nuk i fut duart! E pse jo, më pas, të pastronte radhët e Parlamentit të Shqipërisë me gjithë piramidën e diktaturës komuniste deri te sekretarët e degëve, pra, edhe në fakultete!

Tao i Tosit, në detyrë hyzmeqar i Edit thonjëpaprerë, që shfaqet sot si urryes i madh i diktaturës komuniste, nuk është e qartë pse nuk ka reaguar kur Ditmir Bushati, i biri Sekretarit famëkeq të PPSH në Shkodër, Sulejman Bushati, i cili ka firmos mijëra dëbim-internime të familjeve shkodrane që nuk mendonin si ai dhe Tarrasi i Edit, u bë Ministër i Jashtëm!           

Dhe jo vetëm kaq! Taulanti sot del i shqetësuar pse Ish-Sekretari i degës së PPSH në Fakultetin e Mjekësisë është deputet por nuk u shqetësua kur në Grupin e tij Parlamentar të PS u futën bijë e bija të nomenklaturës komuniste që ndër shqiptarë njihen si vrasës dhe dhjetëra trafikant droge! Madje, heshti edhe kur i papëlqyeri nga ai, President Ilir Meta, dekoroi sigurimsin Mehdi Bushati ndonëse kishte keqtrajtuar deri në çmendi, të bijën e shoqes së tyre të nderuar partizane, Mita Jakova! Apo, pak rëndësi ka kur terrorin e kryen partia edhe ndaj fëmijëve, kur ata janë të tradhtarit si Tuk Jakova; Dhe, në paketë, PS sot i trajton si Tuk Çobanin me familje ashtu dhe viktimat e tij, si të nderuarin Gjon Marka Gjoni!

Por, Taulanti i Nanos në shërbim të Edi Ramës, që sot shqetësohet pse një ish-sekretar partie i Fakultetit të Mjekësisë është deputet dhe mbyllë sytë për llumin komunist që ka mbushur po këtë fakultet dhe Ministrinë e Shëndetësisë, nuk reagoi as kur trafikanti i drogës Saimir Tahiri u bë Ministër i Brendshëm. Madje ky shqetësim mungoi edhe kur Kryeministri Edi Rama cenoi sigurinë kombëtare të SHBA që Tao e ka sot me merak, dhe e mori Saimen në Shtëpinë e Bardhë.

Taulanti mund të bëjë gjëma e bëma me Sali Berishën, por foton që bëri xhiron e botës me Presidentin Barac Obama përballë trafikantit të drogës Saimir Tahiri, nuk e shlyen dot; Nuk e shlyen, sikur të bëjnë përpjekje maksimale si George e Alex Soros ashtu dhe hackerat e angazhuar nga PS për ta sulmuar e-albanian. Kot e kanë!

Mos të harrojmë edhe mbi 800 kriminelët e angazhuar të Sigurimit të Shtetit të cilët Taulanti nuk i pa, para se të shqetësohej për Saliun që u fut në Parlament! Ndonëse PS ka shumicën e mediave nën kontroll, kjo nuk i ka penguar shqiptarët, sepse e kanë provuar në lëkurën e tyre, të informohen se Ministria e Brendshme menaxhohet nga ish-oficer të Sigurimit të Shtetit. Madje, prezenca e Sigurimit është shumë më e madhe se sa në kohën e diktaturës komuniste, për të cilën u shqetësua në këtë fillimjavë hyzmeqari i Edit, Tao!   

Në fund, i paharruar qoftë dhe krimi më i madh që bëri kjo mazhorancë socialiste, grupin e së cilës e drejton Taulant Balla në Parlament, patronazhistët! Përveç të dhënave familjare të shqiptarëve që menaxhojnë këta terroristë socialistë, sot ata mburren lagjeve edhe kur kjo veprimtari kriminale u bë publike, që përveç përkatësisë partiake dinë edhe të ardhurat dhe shpenzimet e shqiptarëve, kreditë dhe borxhet që ata kanë për të mbijetuar, dhe kush prej tyre banon me qira meqë nuk kanë për momentin tjetër zgjidhje!  

Të paharruara, duhet thënë këto krime dhe jo vetëm, sepse “Qeveria Teknike” që paralajmëroi Ilir Meta, tashmë i shpallur si opozitar i devotshëm kundër pushtetit socialistë, është një ogur i zi për shqiptarët që deri më sot ende nuk e kanë parë të dënohet krimi komunistë; Dhe, ishte pikërisht zgjidhja “Qeveria Teknike” ajo e cila ju mundësoi kriminelëve komunistë të mos marrin përgjegjësitë si për diktaturën gjysmëshekullore më të egër në këtë pjesë të Evropës, kryengritjen e armatosur të vitit 1997, ashtu dhe rrënimin e shtetit më 2017, gjë që i mundësoi dhe vijimësinë e këtij shkatërrimi deri në degdisjen për inceneratorë!   

Sot, shqiptarëve nuk u duhet kurrfarë “Qeverie Teknike”, por, një Qeveri që i jep fund pushtimit kriminal komunistë, që sot është instaluar më shumë se kurrë në tokën e përgjakur shqiptare që nuk po thahet dot ndërsa po braktiset nga ata që e kanë humbur shpresën, dhe betejën me të keqen e konsiderojnë të humbur! 

Sot, një orë e më parë, për arsyet e renditura më lartë dhe jo vetëm, Partia Demokratike, pavarësisht synimeve të Taulant Ballës dhe Zeusit socialist shqiptar Edi Rama me sesionin e ri të Parlamentit që fillon në muajin shtator, duhet ta shpall Partinë Socialiste organizatë terroriste shoqëruar me premtimin se ajo nuk do të veproj më kur PD të vjen në pushtet; Dhe, që kjo të mos ngelet një ëndërr shqiptare, opozita demokrate duhet të  premtoj edhe shuarjen e të gjitha burimeve financiare të këtij sunduesi komunist që sot mbanë dhe kontrollon çdo qindarkë të ekonomisë shqiptare.

I pëlqen kjo dikujt ose jo, pak rëndësi ka!

PS, urgjentisht duhet të futet në intubim, se kush do ti pres tubat, nuk i duhet njeriu, por që kjo bishë kriminale duhet të shuhet, askush nuk duhet ta diskutoj më pavarësisht dëshirave pafund të Taos së Tosit dhe hyzmeqarëve të tjerë të Edit thonjëpaprerë, që vazhdojnë e gërmojnë nëpër plehrat e gatuar për inceneratorë socialistë!