“Punësimi i detyruar në shtet”, studentët e mjekësisë në protestë

Studentët e Universitetit të Mjekësisë në Tiranë janë ngritur sërish në protestë ditën e sotme për të kundërshtuar propozimin e qeverisë për punësimin e tyre të detyruar në shtet pas përfundimit të studimeve.

Fillimisht studentë janë mbledhur para Fakultetit të Mjekësisë, duke kërkuar që ministria e Shëndetësisë dhe rektorati të heqin dorë nga ideja. Raportohet se pas qëndresës pranë ambienteve të fakultetit, studentët e mjekësisë kanë nisur të marshojnë duke transferuar protestën pranë Ministrisë së Shëndetësisë për të vazhduar drejt Ministrisë së Arsimit.

Në prag të kësaj proteste, studentët e mjekësisë i kanë nisur një shkresë zyrtare Rektorit të Universitetit të Mjekësisë, ministrisë së Shëndetësisë dhe ministrisë së Arsimit, duke kërkuar që të ndërpresin draftin e menjëhershëm që ata po hartojnë pasi bie ndesh me të drejtat e njeriut.

Në këtë kërkesë, ata gjithashtu shprehen, se paguajnë tarifën më të lartë në të gjithë universitetet dhe kushtet e studimeve duhet të përmirësohen.

Ndryshe, ministria e Shëndetësisë dhe Qeveria kanë propozuar një plan për punësimin me detyrim për të sapo diplomuarit e mjekësisë për një periudhë prej 3 vitesh, ose pagesën e tarifës prej 5000 eurosh për vit akademik.