“Putin nuk gëzon shëndet të mirë!” Peskov: Lajme të rreme!

Kremlini ka hedhur poshtë lajmet në media që Presidenti i Rusisë, Vladimir Putin nuk gëzon shëndet të mirë, duke i quajtur pretendime dhe asgjë tjetër përveç se lajme të rreme.

Duke folur para gazetarëve në Moskë, zëdhënësi i Kremlinit, Dmitry Peskov sot tha se lideri rus 69-vjeçar është në gjendje të mirë, duke shtuar se një kollitje gjatë paraqitjes publike një ditë më parë, ka qenë rezultat i udhëtimit të tij në Iran dhe ekspozimit të gjatë para kondicionerit.

Pavarësisht raportimeve në muajt e fundit që pretendojnë se Putin ka kancer, sëmundjen e Parkinsonit, apo të dyja, RFE raporton se ende nuk ka të dhëna se ai është i sëmurë, dhe Kremlini është shprehur vazhdimisht se lideri rus ka shëndet të mirë.

Dje edhe shefi i Agjencisë Qendrore të Inteligjencës, CIA, në Shtetet e Bashkuara, William Burns, tha se sipas të dhënave që gëzon Agjencia, Putin është i shëndetshëm.

Ndryshe, Presidenti rus Vladimir Putin ka urdhëruar pushtimin e Ukrainës më 24 shkurt. Ai e quan luftën si “operacion special ushtarak” për të çmilitarizuar Ukrainën. Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.