Qeveria miraton nismën e PDK për Gjykatën Speciale, tani kanë ngelur edhe 4 ditë për zgjedhjen e Presidentit
Kanë mbetur edhe katër ditë deri në përfundimin e afatit të përcaktuar nga Gjykata Kushtetuese për zgjedhjen e Presidentit të Kosovës.
Zhvillimet politike u fokusuan te përpjekjet për arritjen e një marrëveshjeje mes partive, por takimi mes kryeministrit Albin Kurti dhe kryetarit të PDK-së, Bedri Hamza, përfundoi pa marrëveshje. Hamza tha se PDK e konsideron miratimin e ndryshimeve të Ligjit për Dhomat e Specializuara si të domosdoshëm dhe se vetëm pas procedimit dhe aprovimit të tij në Parlament është e hapur për diskutime për zgjedhjen e Presidentit.
Ndërkohë, Qeveria e Kosovës miratoi vendimin lidhur me nismën për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar, duke konstatuar se nuk ka pengesa ligjore për procedimin e saj.
Ndryshe, PDK propozon, ndër të tjera, ngushtimin e juridiksionit të Dhomave të Specializuara në Hagë dhe bartjen te gjykatat dhe prokuroria në Kosovë të rasteve që do të konsideroheshin jashtë këtij juridiksioni.
Propozimet përfshijnë edhe mundësinë e ankimit në Gjykatën Supreme të Kosovës, kufizimin e dënimit maksimal në 15 vjet burgim, vuajtjen e dënimeve në Kosovë dhe mundësinë që presidenti t’i falë të dënuarit.
Tani, ndryshimet e propozuara për Gjykatën Speciale pritet të kalojnë në Parlament, ndërsa koha për zgjedhjen e Presidentit ka filluar numërimin mbrapsht.
Instituti Demokratik i Kosovës ka kërkuar që partitë parlamentare t’i përqendrojnë përpjekjet në zgjedhjen dhe betimin e Presidentit para 4 tetorit. Sipas KDI-së, më 4 tetor përfundon periudha gjashtëmujore e ushtrimit të detyrës nga Albulena Haxhiu, ndërsa 6 tetori është afati përfundimtar i përcaktuar nga Gjykata Kushtetuese.
Me nismën e propozuar nga PDK për Gjykatën Speciale të miratuar nga Qeveria dhe të nisur drejt Parlamentit për miratim, partitë parlamentare kanë edhe katër ditë në dispozicion për të gjetur një zgjidhje për zgjedhjen e Presidentit të Kosovës.
