Ramush Haradinaj propozon Hashim Thaçin për President të Kosovës
Ish-Presidentit Hashim Thaçi t’i vazhdohet mandati i lënë në gjysmë si President i Kosovës, me kthimin e tij nga Haga. Këtë propozim e ka bërë sot deputeti i Aleancës, Ramush Haradinaj, nga Kuvendi ku ka folur për krizën institucionale dhe moskonstituimin e institucioneve pas zgjedhjeve të 7 qershorit.
“Në qoftë se do me gjetë zgjidhje Kurti, pra regjimi i Kurtit, me thënë të drejtën, është nderi i kësaj legjislature, po edhe i çdo legjislature, që t’ia vazhdojmë mandatin Presidentit Thaçi. Atij i është marrë mandati me një ndërhyrje ligjore dhe me kthimin e tij, është në nderin tonë, si shqiptarë, si komb, jo për shkak të ndonjë afërsie partiake apo politike, po për shkak të një kundërpërgjigjeje ndaj armiqve të Kosovës që kurrë nuk flenë, që t’ia vazhdojmë mandatin,” tha Ramush Haradinaj.
Ndryshe, Hashim Thaçi u zgjodh President i Kosovës më 26 shkurt të vitit 2016, derisa dha dorëheqje më 5 nëntor 2020 pas konfirmimit të aktakuzës për krime lufte dhe krime kundër njerëzimit nga Dhomat e Specializuara në Hagë.
Ndërkohë, pas më shumë se pesë vjetësh të kaluara në paraburgim dhe procesit të gjatë gjyqësor, Dhomat e Specializuara kanë paralajmëruar se më 16 shtator do të shpallet aktgjykimi në rastin ndaj Hashim Thaçit, Kadri Veselit, Jakup Krasniqit dhe Rexhep Selimit.
Haradinaj: Parlamenti inekzistent
Sot deputeti i Aleancës, Ramush Haradinaj, ka kritikuar gjendjen e krijuar në Parlamentin e Kosovës, duke theksuar se ky institucion është bërë inekzistent.
“E vërteta është që ikja e mandatit të atyre që janë zgjedhur është ikje e mundësisë, edhe kjo po ndodh nga regjimi i Kurtit,” tha Haradinaj duke vlerësuar se Albin Kurti po vepron mbi Kushtetutën.
“Ai e ka instaluar veten mbi Kushtetutën, mbi institucionet, mbi çdo obligim kushtetues e ligjor. Mosthirrja e seancës me arsyetimin se nëse s’ka marrëveshje ndodh dhunë në seancë është vetëm alibi,” tha deputeti i Aleancës, Ramush Haradinaj, ndërsa ka sqaruar se se gjuajtja me vezë për Albin Kurtin ka ndodhur jo pse e ka thirrë seancën, por pse nuk po e kandidon Kryetarin e Parlamentit.
