Raporti Agjencive të zbulimit të SHBA, Kurti: Konfliktet i shkakton autokracia n’Beograd e lidhur me Moskën

Nuk është dallimi etnik ai që shkakton konflikte, por autokracia në Beograd e ndërlidhur me despotin në Moskë, tha Kryeministri Albin Kurti duke komentuar paralajmërimet e Agjencive amerikane të zbulimit për konfliktet e mundshme ndëretnike në Ballkanin Perëndimor.

“Konfliktet nuk janë ndëretnike, nuk është dallimi etnik ai që shkakton konflikt por është autokracia në Beograd e ndërlidhur me despotin në Moskë. Ne kemi paralajmëruar kaherë që shtetet jo demokratike edhe në rajonin tonë jo vetëm ne lindje të Evropës janë rrezik për sigurinë dhe paqen por natyrisht që këtë gjë hollësisht dhe thellësisht sikur SHBA nuk mund ta di askush,” tha Albin Kurti pas inaugurimit të Qendrës Shtetërore Trajnuese për Siguri Kibernetike në Kosovë duke përfunduar:

“Ajo çfarë bëjmë ne është që përgatitemi maksimalisht atë çka mundemi dhe dimë, andaj përuruam këtë Qendër Shtetërore për Siguri Kibernetike për trajnime të cilat do të merren dhe do të ofrohen aty.”

Ndryshe, në raportin e përvitshëm të drejtuesve të Agjencive amerikane të zbulimit që u paraqitën në një seancë të Senatit të SHBA, thuhet se ky rajon mund të përballet me një rrezik në rritje të dhunës ndëretnike gjatë vitit 2024, ku përmenden si shembuj ngjarjet në Banjskë në shtator, ku përleshjet mes nacionalistëve serbë dhe autoriteteve kosovare shkaktuan vdekje dhe plagosje, përfshirë lëndimet e paqeruajtësve të NATO-s, në vitin 2023, si edhe veprimet provokuese të udhëheqësit të serbëve të Bosnjes, Milorad Dodik.