Reciprociteti i Ferit Edi Hoxhës!

nga Agim Popoci

Reciprociteti është një parim themelor i marrëdhënieve midis shteteve dhe një instrument i politikës së jashtme për avancimin e interesave kombëtare, ishte arsyetimi i Ministrit të Jashtëm të Shqipërisë, Ferit Hoxha, pas lajmit që dha homologu i tij serb, Marko Gjuriç për hapjen e Konsullatës së Serbisë në Shkodër, përkatësisht asaj shqiptare në Bujanoc, duke theksuar se kjo nuk nënkupton domosdoshmërisht barazi në përmbajtje, objektiva ose interesa të secilës palë.

Nuk dihet se kush ja mësoi shefit të diplomacisë shqiptare fjalën Reciprocitet, por është e qartë e se ai nuk e ka idenë e kuptimit të kësaj fjale, dhe, kur fillon e bënë shkencë mbi parimin themelor të marrëdhënieve midis shteteve dhe për një instrument të politikës së jashtme për avancimin e interesave kombëtare, çështja bëhet shumë më serioze pa u sqaruar se pse barazia  në përmbajtje, objektivat dhe interesat e secilës palë nuk duhet të vlejnë, por, gjithçka bëhet në interesin e  Serbisë ashtu siç ishte që nga viti 1945!

Sikur kreu i qeverisë së Ferit Hoxhës nuk do të ishte Edi Rama ndoshta do të duhej të analizohej qëllimi dhe interesi i Shqipërisë që të krijojë një prani të përhershme konsullore në Luginën e Preshevës, por, Ferit Edi Hoxha siç duket nuk ka probleme vetëm me njohuritë bazë të diplomacisë por dhe me ato të kombit shqiptar!

Fillimisht, Ferit Edi Hoxha kur vendosi ta sqaroj vendimin për hapjen e Konsullatës serbe në Shkodër, më e pakta që mund të bënte është që të mos e shoqëronte arsyetimin fare me Reciprocitetin si Parim Themelor të Marrëdhënieve mes dy Shteteve, kur dihet dashuria dhe marrëdhënia me Serbinë që ka shefi i Feritit me Partinë e tij, dashuri që nuk ka lidhje me parimet dhe nuk e ndryshon dot as zelli për hapjen e një Konsullate të Përgjithshme të Republikës së Shqipërisë në Luginën e Preshevës edhe pasi ka shkatërruar Kombin Shqiptar me Ballkanin e Hapur.

Sikur reciprociteti të ishte instrument i politikës së jashtme që drejton Ferit Edi Hoxha për avancimin e interesave kombëtare, hapja e Konsullatës së Përgjithshme të Republikës së Shqipërisë në Bujanoc nuk do të ishte kushtëzuar me hapjen e Konsullatës së Serbisë në Shkodër për shumë arsye dhe jo vetëm numri prej 54 serbëve që aktualisht jetojnë vetëm në Qarkun Shkodër, por kërkesa do të bazohej në detyrimin për 100 mijë shqiptarët që jetojnë në Luginën e Preshevës!

Sikur ti qante shpirti Ferit Edi Hoxhës për shqiptarët në Luginë ai do ta mendonte reciprocitetin për bazën ushtarake që ka ndërtuar Serbia në Luginë, keqtrajtimin e ushtarëve të UÇPMB-së, fshirjen e shqiptarëve nga listat e gjendjes civile, ndalimin e Abetares, lëvizjen e lirë si dhe bllokimin e ndihmave në vijimësi të Qeverisë së Kosovës për Luginën, që nuk ka Konsullatë të Feritit e Edi Ramës që e ndihmon!

Po, reciprocitetin Feriti mund ta aplikonte edhe me dërgimin e qindra shqiptarëve të pakënaqur nga Regjimi i Edi Ramës si refugjatë në Serbi, siç bënte krimineli Slobodan Milosheviç me vrakaqorët që u larguan nga Regjimi i Saliut dhe Partia ku Ferit Hoxha është hyzmeqar, ishte e shqetësuar; Shqetësim, të cilin “Milosheviçi zemërgjerë” e kuronte duke iu ndërtuar shtëpi serbëve të Shkodrës që kishin ikur nga Saliu!

Dhe, në fund, reciprociteti më kuptimplotë që Feriti mund ta aplikonte për hapjen e Konsullatës së Serbisë në Shkodër ishte hapja e Konsullatës së Përgjithshme të Republikës së Shqipërisë në Nish, shoqëruar me një kompromis të dhimbshëm, pajtimin me një popull kriminal që ka kryer masakra të tmerrshme ndaj kombit shqiptar!

Sot kur homologu serb, Marko Gjuriç, thotë me krenari se do të hapet Konsullata e Serbisë në Shkodër, në këtë Qark ku janë të deklaruar 54 serbë, vetëm në qytetin e Nishit, aty ku forcat serbe 150 vjet më parë masakruan mbi 70 mijë dhe dëbuan me dhunë mbi 110 mijë shqiptarë vetëm në Sanxhakun e Nishit, bazuar në regjistrimin e fundit të popullsisë në vitin 2022, sot jetojnë zyrtarisht 78 shqiptarë; Ky, po, është reciprocitet ndonëse shqiptarët në Nish janë autoktonë ndërkohë vazhdojnë të quhen muhaxhirë edhe nga vetë shqiptarët e Kosovës dhe Shqipërisë, për dallim thelbësor nga serbët që në Malësitë e Shkodrës përfunduan duke u strehuar nga gjakmarrja për vrasjet e kryera në Serbi dhe Mal të Zi!

Ndryshe, ato që thotë Ferit Edi Hoxha janë dokrra hini që mundohen ta mbulojnë Tradhtinë Kombëtare të një qeverie komuniste shqiptare që vazhdon të punoj për Serbinë, ashtu siç ishte Hapja e Ballkanit nga dy gjytyrymat e sorosëve, Edi Rama dhe Aleksandar Vuçiç, që sot edhe mund t’i hapin këto Konsullata pasi degraduan tokën shqiptare në atë farë derexhe, për të cilën shumë kohë më parë fliste At Gjergj Fishta: Se këtë vend e hangër dreqi, me shku n’Shkodër “Dobro veče”, me shku n’Durrës “Buona sera”, shkon ma poshtë “Kalispera”!