Rekord në Europë, 54% e banorëve të fshatrave në Shqipëri vuajnë nga rreziku i varfërisë

Shqipëria ka një kontrast të fortë mes varfërisë në zonat rurale, që është shumë më e lartë se ajo urbane, ndryshe nga Bashkimi Europian, ku diferenca mes fshatit dhe qytetit është e papërfillshme.

Më shumë sesa gjysma e banorëve në fshatrat shqiptare 54 për qind vuajnë nga rreziku i varfërisë dhe përjashtimit social, sipas të dhënave që janë publikuar nga Eurostat, niveli më i lartë në Europë.

Kjo do të thotë se 54 për qind e popullsisë në fshat plotësojnë të paktën një nga këto tre kritere:

-Janë në rrezik të varfërisë monetare – të ardhurat e një personi janë më të ulëta se 60 për qind e mesatares kombëtare.

-Kanë mungesa materiale ose sociale të rënda – personi nuk ka mundësi të përballojë shpenzime bazë si ngrohja, pagesa e faturave, blerja e ushqimit, rrobave, pushimeve etj.

-Jetojnë në familje me intensitet shumë të ulët pune – kur të rriturit në një familje punojnë shumë pak ose aspak gjatë vitit.

Eurostat ka publikuar të dhënat e vendeve të BE-së për vitin 2024, ndërsa informacioni më i fundit nga Shqipëria është i vitit 2022. Në Bashkimin Europian, treguesi i varfërisë dhe përjashtimit social në zonat rurale është shumë më i ulët sesa Shqipëria, në vetëm 21.4 për qind.

Në zonat rurale të Maqedonisë së Veriut dhe Serbisë, treguesi është në rreth 32-33 për qind, ndërsa mungojnë të dhënat për Kosovën dhe Bosnje Hercegovinën e Malin e Zi.

Diferencë e fortë fshat-qytet

Në zonat urbane treguesi i varfërisë dhe përjashtimit social në Shqipëri ishte 37.6 për qind, gati 14 pikë përqindje më i ulët se në zonat rurale. Pavarësisht diferencës me fshatin, në krahasim me mesataren e BE-së dhe rajon, popullsia që jeton në qytet sërish ka një nivel më të lartë varfërie.

Mesatarja e Bashkimit Europian për zonat urbane është 21 për qind, nga 21.4 për qind që ishte për zonat rurale, që tregon se pasuria është e shpërndarë njëtrajtësisht në të gjithë rajonin.

Edhe në krahasim me rajon, Shqipëria mbetet pas. Maqedonia e Veriut e ka treguesin 25.9 për qind. Më të ulëtin e ka Serbia, ne 14.7 për qind.

Mesatarja kombëtare

Në rang kombëtar, 40.5 për qind e popullsisë është në rrezik varfërie ose përjashtimi social, për vitin 2024, sipas të dhënave që u publikuan së fundmi nga INSTAT. Ndonëse në krahasim me vitet e mëparshme rreziku i varfërisë dhe përjashtimit social është ulur nga 44.5 për qind, që ishte në 2022, të dhënat krahasuese të Eurostat tregojnë se Shqipëria ka nivelin më të lartë në Europë dhe sa dyfishi i mesatares së BE-së prej 21 për qind.

Në rajon, varfërinë dhe përjashtimin social më të ulët e ka Serbia, me 24.3 për qind, e ndjekur nga Maqedonia e Veriut 30 për qind me të dhënat e vitit 2023, dhe, Mali i Zi me 34.1 për qind, të dhëna këto të vitit 2022. Mungon informacioni për Kosovën dhe Bosnje Hercegovinën./Monitor/