Rendiment rekord i specit “somborkë”, Fermerët: Problem, çmimi i ulët!

Kushtet e favorshme klimatike kanë bërë që këtë vit rendimenti i specit “somborkë” të jetë rekord. Bujqit në Podujevë janë të kënaqur me cilësinë dhe prodhimin, por thonë se çmimi i ulët dhe mungesa e sigurisë së shitjes, sidomos për eksport, po ua zbehin kënaqësinë e një viti të mbarë prodhues.

Lavdimi Imeri, nga fshati Ballovc i Komunës së Podujevës, me perime kultivon 9 hektarë tokë, ndërsa 5 hektarë prej tyre i ka të mbjella me spec “somborkë”. Ai thotë për emisionin “Toka” në RTK se këtë vit rendimenti i specit “somborkë” është rekord.

“Falë kushteve të mira klimatike, rendimenti i specit ‘somborkë’ këtë vit është më i larti prej se merrem me bujqësi”, tha ai. Imeri kultivon varietetin tradicional të specit somborkë, i cili në Kosovë kultivohet edhe para luftës së fundit.

“E kultivoj këtë varietet tradicional sepse klientela ime e kërkon më shumë. Ka kërkesë për këtë lloj speci dhe për këtë arsye vazhdoj ta kultivoj,” shtoi ai. Kushtet e mira klimatike, sipas tij, kanë ndikuar edhe në pakësimin e sëmundjeve dhe insekteve te kjo kulturë këtë vit.

“Këtë vit kemi pasur më pak probleme me sëmundje dhe insekte. Kushtet klimatike kanë qenë më të mira dhe kjo është vërejtur edhe te shëndeti i kulturës,”

Të reshurat e mira të këtij viti, theksoi Imeri, kanë ulur edhe nevojën për ujitjen e specit somborkë. “Reshjet kanë qenë të mira dhe kemi pasur më pak nevojë për ujitje. Kjo natyrisht na ka lehtësuar edhe punën, edhe shpenzimet në prodhim,” tha ai. Por, përkundër rendimentit rekord, Lavdim Imeri thotë se ka edhe një shqetësim. Ai personalisht nuk e ka problem shitjen e produktit, por problem këtë vit e konsideron çmimin e ulët.

“Shitjen e produktit personalisht nuk e kam problem, por problem është çmimi. Sivjet çmimi është i ulët dhe kjo na e vështirëson punën, pavarësisht se prodhimi është shumë i mirë”. Ai thotë se me subvencione janë të kënaqur. Por, sipas tij, për bujkun, më e rëndësishmja do të ishte të kishte siguri se ku dhe me çfarë çmimi do ta shesë produktin. “Nuk mjafton vetëm të prodhojmë, duhet ta kemi të sigurt edhe tregun”.

Sipas tij, sigurimi i produktit do të ishte shumë i rëndësishëm për bujqit, ngase nëse ndodh ndonjë fatkeqësi natyrore, të paktën të kenë një mbështetje dhe të mos mbeten vetëm me humbjet.

Në anën tjetër, Afrim Gashi, nga fshati Dobërdol i Komunës së Podujevës, tashmë kishte vjelë specat dhe i kishte sjellë për t’i tregtuar në pikën grumbulluese në fshatin Ballovc të Komunës së Podujevës.

Ai për thotë se cilësia dhe rendimenti i specit këtë vit janë shumë të mirë. Kushtet e mira klimatike, sipas Gashit kanë pakësuar sëmundjet te kjo kulturë dhe se reshjet e bollshme, kanë pakësuar edhe nevojën për ujitje. Por, edhe për Gashin, problem këtë vit është shitja, sidomos çmimi i ulët i këtij produkti.

“Prodhimi është i mirë, cilësia është e mirë, por problem mbetet shitja dhe sidomos çmimi i ulët. Kur çmimi është i ulët, gjithë mundi që kemi bërë gjatë vitit nuk shpërblehet siç duhet”.

Ndërkohë, Afrim Fazliu, drejtues i pikës grumbulluese dhe përpunuese në fshatin Ballovc të Komunës së Podujevës, thotë për RTK se këtë vit në mbarë Kosovën, e po ashtu edhe në Komunën e Podujevës, ka shumë spec “somborkë” të kultivuar.

“Këtë vit ka shumë spec somborkë të kultivuar në mbarë Kosovën, e po ashtu edhe këtu në Komunën e Podujevës. Prodhimi është i madh dhe kushtet klimatike kanë ndikuar shumë pozitivisht”. Sipas tij, kushtet klimatike kanë qenë shumë të mira dhe kjo është reflektuar drejtpërdrejt në prodhim. “Speci ka dhënë shumë dhe cilësia është e mirë,” tha ai. dhe e keqja e vetme është çmimi i ulët këtë vit.

Arsyet e çmimit të ulët të sivjetmë, thotë Fazliu se janë disa, por kryesorja është mungesa e sigurisë së shitjes, sidomos e eksportit. “Arsyet janë disa, por kryesorja është mungesa e sigurisë së shitjes, sidomos e eksportit. Nëse do të kishim siguri për eksport, situata do të ishte shumë më e mirë. Kur nuk e dimë se sa do të shitet jashtë vendit, atëherë edhe çmimi ndikohet”, shtoi ai.

Por, përveç çmimit dhe sigurisë së tregut, Fazliu përmend edhe një problem tjetër, atë të konkurrencës së padrejtë nga përpunues të paregjistruar. “Konkurrenca e padrejtë nga përpunues të paregjistruar na ka shtyrë që ta ndërpresim grumbullimin dhe përpunimin e kësaj kulture. Ne si biznes i regjistruar kemi shpenzime dhe obligime, ndërsa kur dikush punon jashtë sistemit, konkurrenca nuk është e barabartë”, tha ai.

Kështu, një vit me rendiment rekord të specit “somborkë” në Podujevë po përcillet me një paradoks për bujqit: prodhimi dhe cilësia janë të mira, sëmundjet janë më të pakta dhe reshjet kanë lehtësuar ujitjen, por çmimi i ulët dhe pasiguria e tregut vazhdojnë të mbeten shqetësimi kryesor i tyre.