Republika për Rezistencë

nga Albin Kurti*

U bënë 36 vite nga dita kur delegatët e zgjedhur të Kuvendit të Kosovës, e shpallën Kosovën republikë dhe e miratuan një kushtetutë për të.

Më 7 shtator të vitit 1990, dy muaj pas miratimit të deklaratës kushtetuese të 2 korrikut, 80 delegatë të Kuvendit të Kosovës nga 111 sa ishin gjithsej, arritën të mblidhen në Shtëpinë e Kulturës në Kaçanik, në një mbledhje të fshehtë, në të cilën unanimisht e miratuan një dokument kushtetues të sapohartuar dhe e shpallën Kosovën republikë.

Me këtë akt politik të deklarimit të Republikës së Kosovës, i pasuar nga akti juridik i miratimit të kushtetutës së saj, ata iu kundërvynë regjimit okupator të Serbisë që një vit më parë ia kishte suprimuar autonominë Kosovës. Kështu autonomia e fituar më 1974 dhe e suprimuar më 1989, u zëvendësua me republikë më 1990.

Kjo do të ishte e para republikë e Kosovës, një republikë që rezultoi të ishte republikë për rezistencë, njëherë paqësore e mandej e armatosur, kulmuar me luftën çlirimtare dhe të drejtë të popullit tonë të organizuar nga Ushtria Çlirimtare e Kosovës, më 1998 dhe 1999.

Do të duhej të vinte 17 shkurti i vitit 2008, që republika e Kosovës e shpallur më 7 shtator 1990 në Kaçanik, të ripërtrihej në Republikën e Kosovës shtet të pavarur, sovran dhe demokratik, të njohur nga 121 shtete të botës deri më tani.

Kujtojmë me mirënjohje brezin kontribues e të angazhuar për Republikën e Kosovës gjatë viteve ’90, me urimet më të mira për të ardhmen politike të republikës sonë sot!

*Kryeministri në detyrë i Kosovës