Reshje të dendura shiu dhe stuhi, përmbytet Shkodra

Kafshë të ngordhura, banesa nën ujë dhe dëme të konsiderueshme në tokat bujqësore janë pasojë e reshjeve të dendura të shiut dhe stuhisë që përfshiu Shkodrën për disa orë.

Pedonalja në qendër të qytetit të Shkodrës u përmbyt ndërsa në fshatrat e njësisë Rrethina dhjetëra hektar tokë përfunduan nën ujë ashtu si dhe disa banesa që pësuan dëme të konsiderueshme.

Gjithashtu në rrugën e zonës turistike të Shirokës pranë liqenit të Shkodrës gjatë natës ka pasur probleme me rrëshqitjet e dheut ku dhe u vështirësua qarkullimi rrugor.

Në orët e para të mëngjesit janë angazhuar Bashkia Shkodër dhe Prefektura ndërsa ka filluar puna edhe për evidentimin e dëmeve të mundshme dhe normalizimin e situatës.

Gjatë natës, ashtu siç kishte parashikuar IGJEUM, reshjet e dendura të shiut u shoqëruan me shtrëngata.

Aktualisht reshjet e shiut në Shkodër kanë ndaluar dhe në rrugët e qytetit që u bllokuan gjatë natës nuk ka më prezencë uji.