Revolucioni n’Burg!
nga Agim Popoci
“Rama n’burg, Berisha n’burg” nuk është më një klithje e një komunisti me mikrofon në dorë, as kërkesë e një Revolucioni të qytetarëve të zhgënjyer me një klasë politike 35 vjeçare që e plaçkiti këtë vend, sot, kur janë publike pesë kërkesat e këtij Revolucioni nga po ai mikrofon dhe nuk i përmend më njeri, ndërsa kovaçi i këtij Revolucioni vazhdon po me atë devotshmëri të godas në kudhrën që i kanë vënë para, jo për të farkëtuar patkua për një qeveri teknike tranzitore që do të çonte përpara proceset për të cilat u krijua ideja se po buronin nga ky Revolucion, as për ata që do të zbatonin kërkesat e qytetarëve, as të Flamingove të Zvërnecit, as për investitorin dhe dhëndrin e Presidentit amerikan Trump që të heq dorë nga projekti i tij, as për trafikantin ndërkombëtar të drogës që zyrtarisht është pronar i kësaj toke ku u tha se do të ndërtohet resorti turistik, madje as të farkëtoi patkua për të gjithë ata që janë të vendosur të drejtojnë përmbysjen e këtij pushteti!
Por, gjithë ato kritika për Kryeministrin më hajdut të të gjitha kohërave, Edi Rama, çdo natë dhe çdo moment të protestës t’i mbuloj me goditjen e çekanit të kovaçit të kudondodhur, mbi kudhrën që vazhdon e prodhon nga momenti kur Sali Berisha u ul në fron këtu e 35 vjet më parë, trokëllitjen magjike të çekiçit të Sigurimit të Shtetit: Berisha në Burg!
Ndërkohë në Bulevard para Zyrës së Kryehajdutit, ndjenjat janë të përziera ndonëse jo edhe kërkesat, edhe pse mbulohen me vellon e një absurdi aspak qytetarë në emër të qytetarisë shqiptare!
Përballë një autokrati, të gjithëpushtetshëm dhe mafioz, shqiptarët shfaqen me karroca me fëmijë në atë që e quajnë Revolucion dhe ka për qëllim për ta rrëzuar nga pushteti Edi Ramën!
Dhe, ky që do të rrëzohet nga ky Revolucion e pret me shumë mirëkuptim dhe pa prezencë policore, shumë më ndryshe nga Revolucioni i disa javëve më parë i Saliut, që cilësohej i pakuptimtë nga po këta revolucionarë që sot kanë marrë bajrakun në Bulevard dhe dikur nuk shikonin asnjë arsye për t’u mbledhur për 2-3 orë në shesh dhe të shkojnë në shtëpi, siç shkojnë sot, duke miratuar madje dhe dhunën e pashembullt policore mbi opozitarët pa shtet!
Sikur të ishte ky Revolucioni i parë në Botë ndoshta edhe do të kishte kuptim kjo performancë, por pavarësisht broçkullave që nxjerrë nga goja Edi Rama mbi këtë protestë, dhe qëllimit të shumicës qytetare që del në Bulevard për të arritur deri te zbatimi i pesë kërkesave që janë absolutisht të realizueshme, kovaçi komunist duhet të pushoj me trokëllitjet e Sigurimit të Shtetit ndonëse kudhra e tij mbanë edhe pse i bihet mbi 80 vjet, ashtu si dhe gjithë qelbësirat që sollën Edi Ramën në pushtet dhe sot pa një të keqe dalin në krye të protestës duke i mbajtur ison kovaçit të tyre të partisë, “Rama n’burg” si dhe dëshirën e zemrës “Berisha n’burg”, duke mos gjetur qoftë dhe një arsye të vetme për “Balluku n’Burg”!
Ndryshe, ky Revolucion do bëhet edhe më i gërditshëm ndërsa vazhdon dhe shitet si burim i një qytetarie që u irritua nga tërheqja zvarrë e një qytetari në Zvërnec, kur Edi Rama për 13 vjet e tërhoqi zvarrë gjithë Shqipërinë dhe ishin po këta të irrituar që e votuan vetëm një vit më parë; Ose, dhe habia se si Kryeministri Rama e ngatërron vajzën dhe dhëndrin e Presidentit të SHBA me një trafikant droge, kur ishte po ky Ramë i shoqëruar 10 vjet më parë me trafikantin ndërkombëtar të drogës, ministrin Saimir Tahiri, gjatë takimit me Presidentin e SHBA në Shtëpinë e Bardhë, dhe nuk u pa njeri që të irritohet e aq më pak të bindet se duhet të protestohet në Bulevard!
Sot, kur askush nuk duhet të mohoj dëshirat kafshërore të asnjë të ndrituri komunist, fetar dhe jo vetëm, që del në protestë dhe e shijon trokëllitjen “Rama n’burg, Berisha n’burg”, duhet ta ketë parasysh se kryefjala e kryefjalës së kësaj proteste ose trokëllitja e vetme e çekiçit të këtij Revolucioni që të mos përfundoj në pranga, duhet të jetë: “Rama dorëheqje, Qeveri teknike tranzitore”!
Sepse, përvojat e Revolucioneve në Botë më shumë tregojnë se si kanë dështuar këto Revolucione, se sa që i kanë ngopur me bukë popujt që përmbysën pushtete e pushtete!
Për të mos ndodhur kjo gjëmë, për të mos ndodhur ajo që predikojnë qelbësirat që sollën Edi Ramën në pushtet dhe sot duan ta ulin një llum tjetër komunist në fron me ndihmën e të gjithë atyre që sot kërkojnë dorëheqjen e panegociueshme të Kryeministrit Rama ndonëse nuk mbështesin idenë socialiste dhe i thonë vetes demokratë, duhet ta pranojnë këtë ide dhe ti bashkohen vetëm atëherë kur ta kenë kuptuar se çfarë sjellë Revolucioni, ashtu siç e ka kuptuar shumë kohë më parë shkrimtari i njohur francez, Émile Zola, ku përveç se në veprën që e bëri të njohur “L’Assommoir” dhe kryeveprën “Germinal”, ka një mesazh që sqaron pse intelektualët shqiptarë nuk iu afruan për asnjë moment kudhrës së këtij Revolucioni, dhe, si mund të shmanget çuarja e gjithë kësaj energjie në zhgënjim, madje edhe më keq, në shuarjen e shpresës së fundit shqiptare për të cilën po flitet në Bulevard, duke e çuar Revolucionin me duart e veta, aty ku Edi Rama synoi që në ditën e parë të ngjizjes së tij, n’Burg:
– Bukë! A mjafton kjo, o budallenj? …Ai e ha, e megjithatë vdes në vuajtje. Familja e tij e shkatërruar, e gjithë jeta e tij e dhimbshme bie mbi gjoksin e tij dhe e mbyt deri në vdekje. Nuk jeni të gjithë me fat, nëse keni bukë.
Kush ishte ai budalla që e quajti ndarjen e pasurisë, lumturinë e kësaj bote? Këta ëndërrimtarë, revolucionarë, me siguri mund ta përmbysin rendin aktual dhe të ndërtojnë një tjetër, por nëse u presin nga një copë bukë të gjithëve, nuk do t’i shtojnë asnjë gëzim njerëzimit dhe nuk do t’i heqin asnjë vuajtje.
Ata madje do ta përhapnin mjerimin në tokë, dhe një ditë edhe më të këqijtë e të mjerëve, të shtyrë nga kënaqësia paqësore e instinkteve të tyre, do të rënkonin të dëshpëruar, për t’u ngritur në vuajtjet e pangopura të pasionit.
Jo, e vetmja e mirë për ju është të mos jeni, ose, nëse jeni, të jeni fundi, një gur, aq më pak, një kokërr rëre, që mund të rrjedhë gjak nën thembrat e kalimtarëve.
