Rezultati i zgjedhjeve, Kurti: Të gjithë u bashkuan kundër Vetëvendosjes!

Pas publikimit të rezultateve paraprake të raundit të dytë të zgjedhjeve në 21 komuna nga ana e KQZ, Kryeministri Albin Kurti e vlerësoi si jo të kënaqshëm për Lëvizjen Vetëvendosje në këto zgjedhje i cili vjen si rezultat i disa defekteve të brendshme dhe, siç tha ai, bashkimit të të gjithë të tjerëve kundër Vetëvendosjes.

“Rezultati jo i kënaqshëm për neve vjen si rezultat i disa defekteve të brendshme të cilat duhet ti analizojmë më gjatë në vijim dhe i bashkimit të të gjithë tjerëve kundër LVV-së,” tha Albin Kurti ndërsa uroi të gjithë kryetarët e Komunave që u zgjodhën në raundin e dytë më 14 Nëntor:

“Administrimi i procesit zgjedhor nga KQZ ishte shumë i mirë, i uroj të gjithë kryetarët e komunave që u zgjodhën dje. Do të kenë shumë beteja dhe punë në përballje me krimin dhe korrupsionin posaçërisht në fushën e ndërtimit të egër ku paratë e mëdha në qytetet tona po shpërlahen duke shkatërruar me ndërtim të egër. Do të bashkëpunoj me ta në këtë betejë.”

Ndryshe, nga 38 komuna Lëvizja Vetëvendosje arriti të fitoj vetëm në 4 komuna, PDK fitoi në 9 komuna, LDK në 7, AAK në 5, Nisma 1, IQO 1, KDTP 1 dhe Lista Srpska 9.