Rritet inflacioni në eurozonë

Inflacioni në eurozonë është rritur për 2.9 për qind në muajin dhjetor duke hapur kështu çështje të tjera lidhur me fillimin e uljes së normës së interesit nga Banka Qendrore Europiane, ECB.

Rritja vjetore e çmimeve të konsumit në 20 shtete që ndajnë valutën euro në muajin dhjetor është rritur nga niveli më i ulët për më shumë se dy vjet prej 2.4 për qind dhe ishte diçka më i ulët se 3 për qind që e kishin parashikuar ekonomistët, raporton Agjencia e lajmeve Reuters.

Kush e shkaktoi përshpejtimin e inflacionit?

Ulja e subvencioneve shtetërore për gaz, energji elektrike dhe ushqim, që filloi vitin e kaluar nxiti përshpejtimin e sërishëm të inflacionit vjetor në pjesën më të madhe të Evropës. Kjo ka nxitur investitorët që të ulin bastet se ECB që në muajin mars do të filloj me uljen e normës së interesit.

ECB, e cila duhet të mblidhet për të debatuar lidhur me politikën monetare më 25 janar, ka hedhur poshtë pritshmëritë e investitorëve për uljen e normave të interesit së shpejti, duke theksuar se dëshiron të shoh shenjat e uljes së presionit në rroga në mënyrë që të jetë e sigurt se inflacioni është në rrugën e duhur që të arrijë 2 për qind, që është dhe qëllimi kryesor.