Rritja ekonomike, WIWW: Kosova, e para në Evropën Juglindore
Sipas një Raporti të Institutit të Vjenës për Studime Ekonomike Ndërkombëtare, WIIW, Kosova shënoi rritje mesatare ekonomike vjetore prej 4.1 për qind në periudhën 2012–2025, duke renditur e para në mesin e nëntë ekonomive të Evropës Juglindore.
Raporti i hartuar nga ekonomisti Branimir Jovanoviç thekson se rritja mesatare vjetore e ekonomisë së Kosovës gjatë kësaj periudhe ishte 4.1 për qind ndërsa pas saj renditet Shqipëria me 3 për qind, Mali i Zi me 2.9 për qind, Rumania me 2.8 për qind, Bosnje Hercegovina 2.6 për qind, Kroacia 2.5 për qind, Serbia dhe Bullgaria nga 2.4 për qind, ndërsa Maqedonia e Veriut renditet e fundit, me 2.3 për qind.
Raporti, i titulluar “Ekonomia e Serbisë nën Vuçiçin: Larg të qenit mrekulli”, analizon performancën ekonomike të Serbisë nën qeverisjen e Partisë Përparimtare Serbe, SNS, e cila është në pushtet që nga viti 2012, duke e krahasuar këtë periudhë me vitet 2001–2011 dhe me ekonomitë e tjera të rajonit.
Sipas analizës, ekonomia e Serbisë është rritur mesatarisht me 2.4 për qind në vit gjatë periudhës 2012–2025. Kjo është dukshëm më pak se rritja mesatare prej 4.2 për qind në vit, e regjistruar në periudhën 2001–2011.
Autori vlerëson se, megjithëse në Serbi janë shënuar përmirësime në disa tregues, rezultatet e përgjithshme nuk e mbështesin pretendimin se vendi është një prej kampionëve ekonomikë të rajonit.
Raporti evidenton se papunësia ka rënë, por punësimi ka ngecur që nga viti 2019. Ndërkohë, rritja e pagave është shoqëruar me rritjen e kostos së jetesës, pabarazia ekonomike është thelluar dhe shpenzimet për mbrojtjen sociale kanë rënë.
Pas publikimit të raportit ka reaguar gazetari gjerman i FAZ, Michael Martens i cili publikimin e raportit në këtë kohë e ka lidhur me zgjedhjet në Serbi.
Raporti trajton edhe investimet e huaja direkte në Serbi. Sipas tij, ato kanë përbërë mesatarisht 5,7 për qind të Prodhimit të Brendshëm Bruto, PBB, në vit gjatë periudhës 2012–2025, krahasuar me 6.1 për qind në periudhën 2001–2011.
Autori vëren gjithashtu se investimet publike janë rritur ndjeshëm, por janë përqendruar kryesisht në ndërtimin e autostradave. Ndërkohë, tregues të tjerë të infrastrukturës, përfshirë rrjetin hekurudhor, kapacitetet e prodhimit të energjisë elektrike dhe qasjen në ujësjellës e kanalizime, kanë mbetur prapa mesatares së Bashkimit Evropian.
Në fund, Raporti vjen në përfundimin se performanca ekonomike e Serbisë gjatë viteve të fundit ka qenë më e dobët sesa paraqitet në diskursin politik të vendit.
