Rruga e Kombit, bllokohet për një javë aksi Kukës-Morinë, ja si devijon qarkullimi

Duke filluar prej sot në orën 14:00 dhe për një javë, segmenti 3 kilometra i aksit Kukës-Morinë në Rrugën e Kombit, do të jetë i bllokuar deri në përfundim të punimeve të shtresave rrugore në rrugë dhe përafrimit në të dy anët e Urës së Re mbi lumin Drin.

Devijimi i lëvizjes së mjeteve, sipas njoftimit, bëhet te Ura Drinit të Zi-Rruga hyrëse në qytetin e Kukësit dalja për Kosovë në nyjën e Shtiqenit. Ndërsa për lëvizjen nga Morina në Milot, devijimi i lëvizjes bëhet, tek rampa dalëse e mbikalimit të Gostilit tek nyja e re e aeroportit dhe dalja në urën e Drinit të Zi.

Nga përdoruesit e rrugës kërkohet që të respektojnë me rigorozitet sinjalistikën rrugore gjatë procesit të devijimit të të gjithë trafikut nga aksi rrugor 3 km i Rrugës së Kombit ndërsa Policia është angazhuar për të menaxhuar trafikun që do të krijohet nga ky devijim, për shkak të fluksit të lartë të mjeteve e veçanërisht atyre te transportit të mallrave dhe tonazhit të rëndë.